ویب ڈیسک: وزیراعظم شہباز شریف نے کہا ہے کہ آرمی کی گرفت کے سبب افغانستان سمگلنگ صفر ہوگئی،70ماہ بعد مہنگائی کم ترین سطح پر آگئی ہے۔
وفاقی کابینہ کے اجلاس سے خطاب کرتے ہوئے وزیراعظم شہباز شریف کا کہنا تھا کہ پی ٹی آئی والوں نے اپنے غیرقانونی ہتھکنڈوں سے ملک کی بے عزتی کرائی، دھرنوں کے سبب اسٹاک مارکیٹ نیچے آگئی۔
انہوں نے کہا کہ گزشتہ دنوں دھرنوں نے ملک بھر میں ایک ہیجانی کیفیت پیدا کردی تھی بالخصوص اسلام آباد میں ایک افراتفری کا عالم تھا، توڑ پھوڑ ہوئی، رینجرز اور پولیس والے شہید ہوئے۔
وزیراعظم نے کہا کہ دھرنے کے سبب ایک دن میں اسٹاک ایکس چینج کے پوائنٹس ساڑھے تین ہزار کم ہوگئے لیکن جیسے ہی دھرنے کے خلاف کارروائی ہوئی اور دھرنا ختم ہوا تو اسٹاک مارکیٹ اگلے دن دوبارہ کم بیک کرگئی پچھلا نقصان بھی پورا کیا اور مزید گین کیا، اس کا مطلب ہے کہ استحکام ہو تو معیشت بہتر ہوتی ہے۔
انہوں نے کہا کہ حکومتی اقدامات کی بدولت70 ماہ بعد مہنگائی میں کمی آئی ہے اس سے عام آدمی کا بوجھ کم ہوگا، افراط زر اب مزید کم ہوگا تاہم یہ فیصلہ اسٹیٹ بینک کو کرنا ہے۔
وزیراعظم کا کہنا تھا کہ ہمیں معیشت کی گروتھ کی جانب بڑھنا ہے، مہنگائی میں کمی ٹیم ورک کا نتیجہ ہے، اس میں کمی پاکستانیوں کے لیے اچھی خبر ہے، نواز شریف کے دور حکومت میں مہنگائی 3.5فیصد پر تھی اور اب طویل عرصے بعد مہنگائی کم ہوکر 4.9 فیصد کی سطح پر آگئی ہے۔
کابینہ سے خطاب کرتے ہوئے وزیراعظم نے مزید کہا کہ افغانستان سے اسمگلنگ زیرو ہوگئی ہے جس کی وجہ سے چینی کی قیمت نیچے آگئی یہ سب سے اہم فیکٹر ہے، ماضی میں لاکھوں ٹن چینی اسمگلنگ ہوتی تھی تو یہاں قیمتیں بڑھ جاتی تھیں اور اب چینی کی وافر دستیابی کے سبب ایکسپورٹ بھی کی گئی۔
وزیراعظم شہباز شریف نے مزید کہا کہ افغانستان سمگلنگ کا خاتمہ رینجرز اور آئی بی کی وجہ سے نہیں بلکہ آرمی کی مکمل گرفت کی وجہ سے ختم ہوئی۔
