ویب ڈیسک: نومنتخب امریکی صدر ڈونلڈ ٹرمپ نے اسرائیلی یرغمالیوں کی فوری رہائی کا مطالبہ کر دیا، جبکہ ایسا نہ کرنے کی صورت میں مشرق وسطیٰ کو جہنم بھگتنے کی دھمکی بھی دیدی۔
نومنتخب امریکی صدر ڈونلڈ ٹرمپ نے کہا ہے کہ اسرائیلی یرغمالیوں کو رہا نہ کیا گیا تو اس کی بھاری قیمت ادا کرنا پڑے گی، اس موقع پر انتخابی مہم کے دوران اپنے تمام وعدے ایک طرف رکھ کر انہوں نے کھل کر اسرائیل کی حمایت کا اعادہ کیا۔
ٹرمپ کا کہنا تھا کہ ذمہ داروں کو ایسا سبق سکھائیں گے کہ امریکی تاریخ میں اس کی مثال نہیں ملے گی۔ ٹرمپ نے کہا کہ 20 جنوری کی تقریب حلف برداری سے پہلے یرغمالی رہا نہ کیے گئے تو مشرق وسطیٰ کو جہنم بھگتنا ہوگا۔
اس سے قبل غزہ میں اسرائیلی یرغمالیوں سے متعلق اپنے ایک بیان میں حماس کا کہنا تھا کہ غزہ میں اسرائیل کی 14 ماہ کی جنگ میں 33 یرغمالی ہلاک، کچھ لاپتا ہوچکے ہیں۔ اسرائیل اپنی احمقانہ جنگ سے یرغمالیوں کو ہمیشہ کیلئے کھو سکتا ہے۔
فلسطینی مزاحمتی تنظیم حماس کی جانب سے کہا گیا کہ اسرائیل کو یرغمالیوں کیلئے جو کچھ کرنا ہے، کر لے، اس سے پہلے کہ بہت دیرہو جائے۔
یاد رہے کہ نومنتخب امریکی صدر ڈونلڈ ٹرمپ نے اسرائیلی یرغمالیوں کی فوری رہائی کا مطالبہ کر دیا، جبکہ ایسا نہ کرنے کی صورت میں مشرق وسطیٰ کو جہنم بھگتنے کی دھمکی بھی دیدی۔
