ویب ڈیسک: خیبرپختونخوا کے مشیر اطلاعات بیرسٹر ڈاکٹر سیف نے کہا ہے کہ اطلاعات ہے کہ جعلی حکومت گرفتار کارکنوں سے اہلخانہ کی ملاقات نہیں کرا رہی، گرفتار کارکنوں سے اہلخانہ کی ملاقات نہ کرانا فسطائیت کی انتہا ہے، وہ بے چارے پریشانی کے عالم میں در در کی تھوکریں کھا رہے ہیں۔
انہوں نے کہا کہ جعلی حکومت بنائے، کہ گرفتار کارکنان سے اہلخانہ کی ملاقاتیں کیوں نہیں کرائی جارہیں، ملاقاتیں نہ ہونے سے گھر والوں میں شدید اضطراب پایا جاتا ہے، ان کا کہنا تھا کہ جعلی حکومت جلد ملاقات کا بندوبست کرائے تاکہ اہلخانہ کو تسلی ہو کہ انکے پیارے زندہ ہیں۔
بیرسٹر ڈاکٹر سیف کا کہنا تھا کہ گرفتار کارکنان کے اہل خانہ کبھی ایک تھانے اور کبھی دوسرے تھانے کے چکر لگاتے ہیں، ان کے گھر والوں کو بتایا جائے کہ ان کے پیارے تھانے میں ہیں یا ہسپتالوں میں؟ فارم 47 اور جعلی حکومت بتائے ملاقاتیں کیوں نہیں کرائی جا رہیں۔
صوبائی مشیر اطلاعات نے کہا کہ وزیراعلی نے پارٹی وکلاء کو ہدایت کی ہے کہ اس ملاقات کو یقینی بنانے کے لئے قانونی معاونت فراہم کریں، جعلی اور ظالم حکومت نہتے کارکنوں کو کس جرم کی سزا دے رہی ہے۔ احتجاج تو ہر شہری کا جمہوری اور آئینی حق ہے۔
