ویب ڈیسک: آرمی چیف جنرل سید عاصم منیر نے کہا ہے کہ قوم کی حمایت سے پاک افواج ملک کیخلاف ہرسازش ناکام بنا دینگی۔
پاک فوج شعبہ تعلقات عامہ آئی ایس پی آر کے مطابق آرمی چیف جنرل سید عاصم منیر نے نارووال اور سیالکوٹ میں ٹریننگ فیلڈ کا دورہ کیا، آرمی چیف کی آمد پر کور کمانڈر گوجرانوالہ اور آئی جی ٹریننگ نے ان کا استقبال کیا، اس دوران آرمی چیف کو مشق کے مقاصد پر بریفنگ دی گئی۔
آئی ایس پی آر کے مطابق آرمی چیف نے جوانوں کے ساتھ دن گزارا اور جوانوں کے تربیتی معیار، پیشہ وارانہ تیاریوں اور بلند جذبے کو سراہا، اس دوران آرمی چیف جنرل عاصم منیر نے مشقوں کا معائنہ بھی کیا۔ آرمی چیف نے دشمن کے کسی بھی حملہ سے نمٹنے کے لیے مسلسل تیار رہنے کی اہمیت کو اجاگر کیا۔
پاک فوج کے شعبہ تعلقات عامہ کے مطابق آرمی چیف جنرل سید عاصم منیر نے جوانوں سے گفتگو کرتے ہوئے کہا کہ قوم کی حمایت سے افواج ملک کیخلاف ہرسازش ناکام بنا دینگی، مسلح افواج ملکی دفاع اور سلامتی کو لاحق کسی بھی خطرے سے نمٹنے کی صلاحیت رکھتی ہیں۔
انہوں نے جوانوں سے بات چیت کرتے ہوئے مزید کہا کہ قوم کی حمایت سے افواج ملک کیخلاف ہر سازش کو ناکام بنا دیں گی، مسلح افواج تمام خطرات سے نمٹنے کی صلاحیت رکھتی ہیں۔
