ویب ڈیسک: سعودی وزیر خارجہ فیصل بن فرحان نے کہا ہے کہ فلسطین میں انسانی بحران ناقابل برداشت ہوچکا ہے۔
تفصیلات کے مطابق سعودی وزیر خارجہ شہزادہ فیصل بن فرحان نے کہا ہے کہ غزہ کی پٹی میں حالیہ کشیدگی اور تنازعات کے دائرے میں توسیع کے اثرات ایک ایسی جامع جنگ تک پہنچنے کے خطرے کو ظاہر کر رہے ہیں جس پر قابو پانا انتہائی مشکل ہو جائے گا۔
انہوں نے کہا کہ فلسطین میں انسانی بحران کے حالات ناقابل برداشت حدوں کو چھونے لگے ہیں کیونکہ وحشیانہ جنگی کارروائیوں میں 44 ہزار سے زیادہ فلسطینی اپنی جانیں گنوا چکے ہیں، اور ایک لاکھ سے زیادہ زخمی پڑے ہیں، دوسری طرف ساڑھے تین لاکھ افراد مخدوش صورتحال میں رہ رہے ہیں۔
شہزادہ فیصل بن فرحان نے مزید کہا کہ سعودی عرب نے فلسطینی متاثرین کو تعاون اور امداد فراہم کرنے میں کوئی کسر نہیں چھوڑی، غزہ کی پٹی میں بحران کے آغاز سے لے کر اب تک اس حوالے سے جاری منصوبوں کی رقم 500 ملین ریال سے زیادہ ہوگئی ہے۔
سعودی وزیر خارجہ کے مطابق مملکت کی جانب سے غزہ کی پٹی میں فلسطینی عوام کو 6,600 ٹن سے زائد خوراک اور پناہ گاہوں کا سامان بھیجا گیا ہے، ادویات، طبی سامان اور ایمبولینسز فراہم کی گئی ہیں، تاہم اس تمام تر صورتحال کے باوجود اسرائیل کی جانب سے جاری بربریت ناقابل برداشت ہوتی جا رہی ہے۔
