ویب ڈیسک: پشاور ہائیکورٹ کی جانب سے پی ٹی آئی رہنماؤں کی راہداری ضمانت منظور کر لی گئی، جبکہ اس کے ساتھ ساتھ ان کیخلاف درج مقدمات کی رپورٹ طلب کر لی گئی۔
پشاور ہائیکورٹ کے جسٹس ایس ایم عتیق شاہ اور جسٹس صاحبزادہ اسد اللہ پر مشتمل دو رکنی بینچ نے پی ٹی آئی رہنماؤں علی زمان ،عالیہ حمزہ، حمیدہ شاہ اور سابق رکن قومی اسمبلی عادل بازئی کی درخواستوں پر سماعت کی۔
درخواست گزاروں کے وکلاء نے استدعا کی کہ درخواست گزاروں کے خلاف جتنے مقدمات درج ہیں، ان کی تفصیل فراہم کی جائے۔ ڈپٹی اٹارنی جنرل نے مؤقف اپنایا کہ یہ یہاں راہداری ضمانت لیتے ہیں پھر عدالتوں میں پیش نہیں ہوتے۔ جسٹس ایس ایم عتیق نے ریمارکس دیئے کہ جن کو گرفتار کرنا ہے ان کےلئے رات کو جیل کھول دیتے ہیں اور ہمیں کہہ رہے ہیں کہ ریلیف نہ دیں۔
عدالت نے حکم دیا کہ درخواست گزاروں کے خلاف جتنے مقدمات درج ہیں، 7 دن میں رپورٹ پیش کریں، آپ رپورٹ پیش کریں ہم انہیں حکم دینگے کہ آپ متعلقہ عدالتوں میں پیش ہوجائیں، یہ ان کا بنیادی حق ہے کہ آپ ان کو مقدمات کی تفصیل فراہم کریں۔
ڈپٹی اٹارنی جنرل نے دوران سماعت کہا کہ ہم رپورٹ پیش کریں گے، تاہم عدالت انہیں پابند کرے کہ یہ متعلقہ عدالتوں میں پیش ہونگے، عدالت نے دیگر کیسز میں پابند کیا ہے کہ متعلقہ عدالتوں میں پیش ہوں جس پر عدالت نے ریمارکس میں کہا کہ آپ آرڈر پیش کریں ہم ان کو پابند کریں گے یہ وہاں پیش ہوں گے۔
بعدازاں عدالت نے وفاقی حکومت سے 7 دن میں درج مقدمات کی رپورٹ طلب کرلی اور آئندہ سماعت تک درخواست گزاروں کو درج مقدمات میں گرفتار نہ کرنے کا حکم دے دیا۔
