ویب ڈیسک: نائب وزیراعظم و وزیرخارجہ اسحاق ڈار نے کہا ہے کہ اسرائیل نے مشرق وسطیٰ کی سلامتی کوداؤپر لگادیا ہے ۔
اقتصادی تعاون تنظیم کے وزارتی کونسل اجلاس سے خطاب کرتے ہوئے نائب وزیراعظم اسحاق ڈارنے مشرق وسطی کی بگڑتی ہوئی صورتحال پر شدید تشویش کا اظہار کیا ۔
انہوں نے کہا کہ آج کے اجلاس میں پاکستان کی نمائندگی اعزاز ہے، میزبانی اور مہمان نوازی کے لیے ایرانی حکومت کے شکرگزار ہیں۔
اسحاق ڈار کا کہنا تھا کہ وہ اسرائیل کی جانب سے غزہ، لبنان اور شام میں مظالم کی سخت مذمت کرتے ہیں، مشرق وسطی کی بگڑتی ہوئی صورتحال پر شدید تشویش ہے، اسرائیل نے خطے کی سلامتی اور سکیورٹی کو دا ؤپر لگا دیا ہے۔
نائب وزیر اعظم نے کہا کہ مشرق وسطی کے لوگوں کو تشدد، جنگ سے پاک اور خوف سے آزاد زندگی گزارنے کا حق حاصل ہے، پاکستان خطے میں امن کا خواہاں ہے،پاکستان ای سی او کو علاقائی ممالک کے درمیان باہمی تعاون کو فروغ دینے کے لیے ایک اہم پلیٹ فارم کے طور پر دیکھتا ہے۔
ان کا کہنا تھا کہ اسلامی جمہوریہ ایران کی جانب سے اجلاس کے تجویز کردہ عنوان کے مطابق ای سی او ریجن کی ترقی اور خوشحالی علاقائی تجارت کی توسیع پر منحصر ہے۔
اسحاق ڈار نے مزید کہا کہ خطے کی پائیدار ترقی کے لیے ای سی او کا تجارتی معاہدہ ایک مخصوص وقت میں ٹیرف کو کم کر کے علاقائی اقتصادی مفادات کے فروغ کے لیے ایک سازگار پلیٹ فارم ہے۔
