ویب ڈیسک: پاکستان پیپلزپارٹی کے چیئرمین بلاول بھٹو زرداری نے مولانا فضل الرحمان کو مدارس رجسٹریشن بل پر صدر کے دستخط کی یقین دہانی کرادی ہے ۔
تفصیلات کے مطابق مدارس بل کے معاملے پر مولانا فضل الرحمان کی ناراضی دور کرنے اور انہیں منانے کے لئے چیئرمین پیپلز پارٹی بلاول بھٹو زرداری اپنے وفد کے ہمراہ جے یو آئی سربراہ کی رہائش گاہ پہنچے۔
بلاول اور فضل الرحمان نے ملاقات میں اہم سیاسی امور پر بات چیت جبکہ جے یو آئی سربراہ نے مدارس رجسٹریشن ایکٹ پر صدر مملکت کے دستخط نہ ہونے کے حوالے سے گفتگو بھی کی۔
ملاقات میں جے یو آئی کے سنیٹر مولانا عبدالغفور حیدری، سنیٹر کامران مرتضی، حاجی غلام علی ، مولانا لطف الرحمان، مولانا اسعد محمود جبکہ پیپلزپارٹی کے راجہ پرویز اشرف، قمر زمان کائرہ شریک تھے۔
ایک گھنٹے کی ملاقات کے بعد بلاول بھٹو وفد کے ہمراہ مولانا فضل الرحمان کی رہائش گاہ کے باہر آئے اور میڈیا سے بات چیت کیے بغیر روانہ ہوگئے تاہم راجہ پرویز اشرف اور جے یو آئی کے سینیٹر کامران مرتضی نے میڈیا سے گفتگو کی۔
دونوں جماعتوں کے رہنماؤں نے ملاقات کو اچھا قرار دیا۔ سینیٹر کامران مرتضی نے کہا کہ صدر کسی سیاسی جماعت کا نہیں ریاست کا صدر ہوتا ہے، مدارس کی رجسٹریشن پر بلاول بھٹوزرداری پہلے بھی ہمارے ساتھ تھے اب بھی ہمارے ساتھ ہیں۔
جے یو آئی کے سیکریٹری جنرل نے بلاول بھٹو زرداری کی مولانا فضل الرحمن سے ملاقات کے بعد میڈیا سے گفتگو کرتے ہوئے کہا کہ پیپلز پارٹی نے آج یقین دہانی کرا دی ہے کہ صدر مدارس کی رجسٹریشن کے بل پر دستخط کر دیں گے۔
انہوں نے کہا کہ مدارس کی رجسٹریشن سے متعلق بل سینٹ اور قومی اسمبلی دونوں سے منظور ہوچکا ہے، اب دینی مدارس کے بل پر دستخط کے حوالے سے صدر کی جانب سے تاخیر ہو رہی ہے۔ دونوں رہنمائوں کی ملاقات میں صرف دینی مدارس کے بل پر ہی بات ہوئی۔
قبل ازیں ملاقت کے دوران جمعیت علمائے اسلام کے امیر مولانا فضل الرحمان نے پاکستان پیپلزپارٹی کے چیئرمین بلاول بھٹوزرداری سے مدارس رجسٹریشن بل پرصدرکے دستخط نہ ہونے پر تشویش کا اظہار کیا۔
مولانا فضل الرحمان کا کہنا تھاکہ مدارس رجسٹریشن بل پردونوں ایوانوں سے منظوری کے باوجود صدرکے دستخط کیوں نہیں ہوئے؟
اس پر بلاول نے یقین دہانی کرائی کہ مدارس رجسٹریشن بل پردستخط نہ ہونے پرحکومت سے بات کروں گا۔
