ویب ڈیسک:وزیرِ اعلیٰ خیبر پختونخوا کے احکامات کی روشنی میں ہنگو میں گرینڈ جرگہ منعقد ہوا جس میں آئندہ کوہاٹ روڈ پر کوئی احتجاج نہ کرنے کا متفقہ فیصلہ کیا گیا ۔
تفصیلات کے مطابق وزیراعلیٰ خیبر پختونخوا علی امین گنڈا پور کی ہدایات پر کمشنر کوہاٹ ڈویژن سید معتصم باللہ شاہ نے ہنگو اور اورکزئی کے ڈپٹی کمشنرز اور ڈی پی اوز کے ہمراہ ہنگو میں گرینڈ جرگہ کے ممبران اور کوہاٹ ڈویژن امن کمیٹی کے اراکین کے ساتھ تفصیلی ملاقات کی جس میں اہم مشاورت کی گئی۔
ہنگو میں گرینڈ جرگہ کے مشترکہ اجلاس میں ٹلکوہاٹ روڈ پر آئندہ کوئی بھی احتجاج نہ کرنے کا متفقہ فیصلہ کیا گیا ۔
گرینڈ جرگہ میں یہ بات بھی طے کی گئی کہ خلاف ورزی کرنے پر پولیس قانون شکنوں کے خلاف کارروائی کرے گی جبکہ کرم کے مسئلے پر ہنگو، کوہاٹ اور اورکزئی میں کسی قسم کے جلسے یا جلوس نہیں ہوں گے۔
مشترکہ اجلاس میں فیصلہ کیا گیا کہ کرم کے دونوں فریق اور گرینڈ جرگہ عنقریب کوہاٹ میں معقول جنگ بندی پر معاہدہ کریں گے اور افہام و تفہیم سے مسئلہ کا مستقل حل نکالیں گے ۔
فیصلہ کیا گیا کہ جنگ بندی کی خلاف ورزی نہیں کی جائے گی۔
