ویب ڈیسک: کرم میں امن و امان کے مکمل قیام کے لیے پختون امن جرگہ صدہ پہنچ گیا، 125رکنی جرگہ کرم کے عمائدین سے ملاقات کرے گا۔
25 گاڑیوں پر مشتمل 125رکنی جرگے میں مفتی کفایت اللہ، نصیر کوکی خیل، امان اللہ وزیر اور حمید شیرانی سمیت وزیرستان، مہمند، باجوڑ، خیبر، اورکزئی اور خیبر پختونخوا کے مختلف علاقوں کے علما اور قبائلی عمائدین شامل ہیں۔
جرگہ ممبران قبائلی عمائدین سے ملاقات کے لیے پہلے مرحلے میں صدہ پہنچے ہیں جس کے بعد وہ پاراچنار جائیں گے۔
ضلع کرم میں قبائل کے مابین ہونے والی فائر بندی پر عمل درآمد جاری ہے اور اب تک کوئی ناخوشگوار واقعہ پیش نہیں آیا، تاہم فائربندی ہوئے 4 روز گزر گئے لیکن اس کے باوجود پشاور پاراچنار مرکزی شاہراہ سمیت آمدورفت کے تمام راستے بند ہیں۔
ادھر امن و امان کے مکمل قیام کے لیے پشتون امن جرگہ ضلع کرم پہنچ گیا ہے۔
دوسری جانب خیبرپختونخوا پولیس نے کرم میں امن و امان کی صورتحال برقرار رکھنے کے لیے 400 ایکس سروس مین کی بھرتیوں سے متعلق محکمہ داخلہ کو خط ارسال کردیا۔
