ویب ڈیسک: پاکستان تحریک انصاف (پی ٹی آئی )نے گورنر خیبر پختونخوا کی جانب سے 5دسمبرکو طلب کردہ کل جماعتی کانفرنس (اے پی سی )میں شرکت نہ کرنے کا اعلان کیا ہے ۔
پاکستان تحریک انصاف کے ترجمان و مرکزی سیکرٹری اطلاعات شیخ وقاص اکرم نے اس حوالے سے بتایا کہ اے پی سی میں شرکت نہ کرنے کا فیصلہ مظلوم، نہتے اور پرامن شہریوں کے قتلِ عام میں خاموش سہولتکاری کرنے اور سیاسی اجرت کے عوض قاتلوں کی ہمنوائی کے پیشِ نظر کیا گیا۔
انہوں نے کہا کہ پیپلزپارٹی کا خیبرپختونخوا میں کوئی مینڈیٹ نہیں، خیبرپختونخوا کے عوام کی نمائندگی پاکستان تحریک انصاف کے پاس ہے اور تحریک انصاف اس ذمہ داری کو بخوبی سرانجام دے رہی ہے۔
انہوں نے کہا کہ پیپلزپارٹی تحریک انصاف پر پابندی کے مذموم حکومتی ایجنڈے کی سرگرم پشت پناہ ہے جس نے بلوچستان اسمبلی سے پابندی کی قرارداد کی منظوری میں کلیدی کردار ادا کیا۔
ایک طرف پیپلز پارٹی خصوصا سندھ میں پاکستان تحریک انصاف کے کارکنوں کی غیرقانونی پکڑ دھکڑ اور ان کی بدترین ہراسگی میں بڑھ چڑھ کر مصروف ہے اور دوسری جانب بے جان نمائشی مجالس منعقد کرکے اپنی جمہوریت نوازی کا تاثر دینا چاہتی ہے۔
ترجمان پی ٹی آئی نے مزید کہا ہے کہ صوبے کے عوام کے ایشوز کے حل پر پختونخوا حکومت سنجیدہ ہے بلکہ وفاق کی ریشہ دارانیوں اور معاونت کے بغیر بھی الحمدللہ پیچیدہ ترین معاملات کو سیاسی بالغ نظری اور موثر انتظامی اقدامات سے حل کرنے میں مصروف ہے۔
انہوں نے کہا صوبے میں منعقد کردہ پختون اور کرم جرگے اس کی کلیدی مثالیں ہیں،کہ گورنر کسی معاملے پر سنجیدہ تجاویز و رائے صوبائی حکومت کو بھجوائیں گے تو صوبائی حکومت ضرور غور کرے گی ۔
