ویب ڈ یسک: پاکستان تحریک انصاف کے رہنماؤں میں اندرونی اختلافات کے خاتمے کے حوالے سے اہم پیشرفت ، وزیراعلیٰ خیبر پختونخوا علی امین گنڈا پور نے عاطف خان کو ٹیلی فونک کرکے سی ایم ہائوس آنے کی دعوت دے دی ۔
ذرائع کے مطابق پی ٹی آئی کے سینئر رہنماء اور سابق سپیکر قومی اسمبلی اسد قیصر اور ایم این اے شہرام ترکئی نے وزیراعلیٰ خیبر پختونخوا علی امین گنڈا پور کو پارٹی کے سینئر رہنماء عاطف خان کو ٹیلی فون کال کرنے پر آمادہ کیا۔
ذرائع کا بتانا ہے کہ علی امین گنڈا پور کا کہنا تھا باہمی اختلافات سے پارٹی کو نقصان ہوتا ہے، اندرونی اختلافات مل بیٹھ کر حل کرتے ہیں۔
ذرائع کے مطابق علی امین گنڈا پور نے عاطف خان کو وزیر اعلی ہاؤس آنے کی بھی دعوت دی، عاطف خان نے وزیراعلیٰ ہائوس آنے کی حامی بھرلی۔
پی ٹی آئی کے رہنما عاطف خان نے بھی وزیر اعلیٰ خیبر پختونخوا علی امین گنڈا پور سے رابطے کی تصدیق کر دی ہے۔
واضح رہے کہ پاکستان تحریک انصاف کے رہنماؤں کے اختلافات کسی سے ڈھکے چھپے نہیں ہیں اور وزیر اعلیٰ کے پی علی امین گنڈا پور اور عاطف خان کے ایک دوسرے پر بیانات ماضی میں کئی بار منظر عام پر آ چکے ہیں، دونوں رہنما ایکدوسرے پر ماضی میں سنگین نوعیت کے الزامات عائد کرتے رہے ہیں۔
