ویب ڈیسک: خنجراب پاس کو پاکستان، چین اور وسط ایشیائی ریاستوں کے درمیان تجارت کے لیے 77سال بعد پہلی مرتبہ سال بھر کے لیے فعال بنا دیا گیا۔
خنجراب پاس سے مشینری، ٹیکسٹائل، الیکٹرانکس اور اشیا خور و نوش سمیت دیگر تجارتی سامان کی نقل و حمل ہوتی ہے، جو ہمسایہ ممالک کی معاشی ترقی کے لیے نہایت اہمیت کا حامل ہے۔
خنجراب پاس کے سال بھر کھلنے سے چین، پاکستان اور خطے کے دیگر ممالک کے درمیان اقتصادی تعلقات مزید مضبوط ہوں گے جس سے علاقائی تجارت کو فروغ ملے گا۔
گزشتہ برسوں کے دوران، پاکستان نے اس راستے کو وسط ایشیائی ریاستوں خصوصا تاجکستان، کرغزستان اور قازقستان کو صنعتی اور زرعی مصنوعات کی ترسیل کے لیے بھی استعمال کیا ہے۔
نیشنل لاجسٹکس کارپوریشن نے سوست ڈرائی پورٹ پر سرحد پار تجارت کے لیے جامع اقدامات اٹھائے ہیں جن میں حکام اور تاجر برادری کے لیے سینٹرل ہیٹنگ سسٹم کی تنصیب اور دیگر سہولیات شامل ہیں۔
