ویب ڈیسک: وزیراعلیٰ خیبر پختونخوا علی امین گنڈاپور نے کہا ہے کہ خیبر پختونخوا کے عوام پورے ملک کی جنگ فرنٹ لائن پر لڑ رہے ہیں۔
تفصیلات کے مطابق وزیراعلیٰ خیبرپختونخوا علی امین گنڈا پور نے ضلع خیبر کا دورہ کرتے ہوئے تحصیل باڑہ میں نو قائم شدہ گورنمنٹ گرلز ڈگری کالج کا افتتاح کر دیا۔
دورے کے موقع پر رکن قومی اسمبلی اقبال آفریدی ، اراکین کابینہ مینا خان آفریدی اور سہیل آفریدی بھی وزیر اٰعلی کے ہمراہ تھے۔
نو قائم شدہ گورنمنٹ ڈگری کالج کی افتتاحی تقریب سے خطاب کرتے ہوئے وزیراعلیٰ علی امین گنڈا پور کا کہنا تھا کہ بانی چیئرمین پی ٹی آئی نے ہمیشہ قبائلی عوام کے حقوق اور ترقی کی بات کی ہے،قبائلی عوام نے اس ملک کے لیے بہت قربانیاں دی ہیں لیکن ان کی قربانیوں کا صلہ انہیں ابھی تک نہیں ملا، ایک وقت آئے گا سب کو قبائلی عوام کی قربانیوں کا احساس ہوگا۔
وزیراعلیٰ خیبر پختونخوا علی امین گنڈاپور نے کہا کہ بہت جلد قبائلی عوام مثبت تبدیلی محسوس کریں گے اور ضم اضلاع کے حقوق کے لیے ہر دستیاب فورم پر آواز اٹھاں گا، قبائلی علاقوں کو دوسرے ترقی یافتہ علاقوں کے برابر لانے کے لیے ایک جامع پلان کے تحت اقدامات کر رہے ہیں۔
انہوں نے کہا کہ صوبائی حکومت ضم اضلاع پر بھر پور وسائل خرچ کر رہی ہے لیکن وفاقی حکومت ضم اضلاع کے فنڈز نہیں دے رہی ہے، ضم اضلاع کے جاری ترقیاتی منصوبوں کے لیے ہر مہینے صوبائی حکومت کی جانب سے فنڈز جاری کیے جا رہے ہیں، ضم اضلاع کی ترقی اور وہاں سہولیات کی فراہمی ہماری ترجیحات میں شامل ہے۔
انہوں نے کہا کہ ضم اضلاع کے تعلیمی اور طبی اداروں میں تعینات جو بھی لوگ ڈیوٹی نہیں کر رہے، عوام ان کی نشاندہی کریں ان کے خلاف کارروائی کی جائے گی، ضم اضلاع کے 30 ہزار گھرانوں کو مفت سولر سسٹم فراہم کر رہے ہیں۔
علی امین گنڈا پور کہنا تھا کہ خواتین کی تعلیم کا فروغ موجودہ صوبائی حکومت کی ترجیحات میں سرفہرست ہے، ہم بچیوں کی تعلیم پر خاطر خواہ سرمایہ کاری کر رہے ہیں کیونکہ تعلیم یافتہ مائیں ہی ایک تعلیم یافتہ قوم کی ضامن ہیں۔
انہوں نے کہا کہ ہم اپنی بچیوں پر سرمایہ کاری کرکے انہیں اپنا اثاثہ بنائیں گے، ہماری بچیوں میں بے پناہ صلاحیتیں موجود ہیں، صرف انہیں مواقع فراہم کرنے کی ضرورت ہے۔
وزیراعلیٰ کا مزید کہنا تھا کہ ہم بچیوں کو تمام شعبوں میں بھرپور مواقع فراہم کریں گے، وہ آگے آئیں اور اپنی صلاحیتوں کا لوہا منوائیں۔ طلبہ اپنے والدین اور اساتذہ کی عزت کریں۔
