ویب ڈیسک: 9 مئی کو جی ایچ کیو حملہ کیس میں بانی پاکستان تحریک انصاف عمران خان ودیگر ملزمان پر فرد جرم عائد کردی گئی ۔
انسداد دہشت گردی عدالت کے جج امجد علی شاہ نے اڈیالہ جیل میں 9مئی جی ایچ کیو حملہ کیس کی سماعت کی،بانی پی ٹی آئی عمران خان اور شاہ محمود قریشی کو کمرہ عدالت میں پیش کیا گیا۔
سماعت کے دوران پی ٹی آئی رہنماء عمرایوب، شیخ رشید، فواد چوہدری، زرتاج گل اور راجہ بشارت سمیت دیگر ملزمان بھی پیش ہوئے۔
وکلا کے دلائل مکمل ہونے کے بعد جج امجد علی شاہ نے فرد جرم کمرہ عدالت میں پڑھ کر سنائی جبکہ عمران خان سمیت دیگر ملزمان نے صحت جرم سے انکار کیا ہے۔
بانی پی ٹی آئی کے علاوہ شیخ رشید سمیت دیگر ملزمان پر بھی فرد جرم عائد کی گئی ہے،پولیس نے سابق صوبائی وزیر راجہ بشارت کو اڈیالا جیل کے باہر سے گرفتار کرلیا۔
سانحہ 9 مئی جی ایچ کیو حملہ کیس کا مقدمہ تھانہ آر اے بازار میں درج ہے، مقدمے میں عمران خن سمیت 143 ملزمان نامزد ہیں۔
عدالت 23ملزمان کو پہلے ہی اشتہاری قرار دے چکی ہے، اشتہاری قرار دیے گئے ملزمان میں شہباز گل، ذلفی بخاری اور مراد سعید بھی شامل ہیں۔
پی ٹی آئی کے 70رہنمائوں پر الزام ہے کہ انہوں نے 9 مئی کی منصوبہ سازی کی اور کارکنان کو جلائو گھیرئوا اور عسکری وسرکاری تنصیبات پر حملوں کے لیے اکسایا۔
