ویب ڈیسک: سابق وفاقی وزیر سینیٹر فیصل واڈا نے کہا ہے کہ 26ویں آئینی ترمیم کے معاملے پر فضل الرحمان کے ساتھ ہاتھ نہیں ہوگا بلکہ ہم سب ان کے ساتھ کھڑے ہوں گے۔
مولانا فضل الرحمان سے ملاقات کے بعد سینیٹر کامران مرتضی کے ہمراہ میڈیا سے گفتگو کرتے ہوئے فیصل واڈا کا کہنا تھا کہ میرا دماغ بالکل قبائلیوں کی طرح کا ہے، دوستی اور دشمنی کھل کر نبھاتا ہوں۔
انہوں نے کہا کہ فیصل واڈا نے کہا کہ مدارس سے متعلق بل اور دیگر معاملات پر بات ہوئی ہے،مولانا فضل الرحمان کا کردار اور سیاسی دور اندیشی بہت اچھی ہے۔
فیصل واڈا نے کہا کہ سب کو ملکر جمہوریت کے تحت پرامن طریقے سے آگے بڑھنے اور پاکستان کیلیے ون، ون والی صورت حال بنانی ہوگی تاکہ ہمارا ملک آگے بڑھے، سیاسی مخالفت اپنی جگہ پر رہے مگر یہ دشمنی اور انتشار کی صورت میں تبدیل نہ ہو۔
سابق وفاقی وزیر نے کہا کہ مولانا فضل الرحمان سے 26ویں آئینی ترمیم اور عمران خان کی جان کو لاحق خطرات کے حوالے سے بات ہوئی، جے یو آئی کے سربراہ کا جو کردار ہے پہلے ہم اس کو سمجھ نہیں سکے تھے مگر اب آنکھیں کھل گئیں ہیں۔
فیصل واڈا نے کہا کہ مولانا فضل الرحمان سے جو میری ون آن ون ملاقات ہوئی اس کے بارے میں زیادہ بات نہیں کروں گا۔
سینیٹر کامران مرتضی نے کہا کہ ہم نے فیصل واڈا سے سیکھا اور میرا خیال ہے کہ بات آگے بڑھے گی۔
قومی حکومت کے حوالے سے پوچھے گئے سوال پر فیصل واڈا نے کہا کہ اس وقت ملک میں قومی حکومت ہے، خیبرپختونخوا میں پی ٹی آئی کو جے یو آئی کا مینڈیٹ دیا گیا، فارم 47 کے ساتھ جے یو آئی کے مینڈیٹ کی بات بھی ہونی چاہیے۔
انہوں نے ایک اور سوال پر کہا کہ میں اسٹیبلشمنٹ اور جوڈیشری کا حامی ہوں، پاکستان کی خاطر، انتشار اور نفرت و سیاست کی تقسیم کو ختم کرنے کیلیے ایم کیو ایم، ٹی ایل پی سمیت تمام سیاسی جماعتوں کے پاس جاں گا تاہم انہوں نے پی ٹی آئی کے پاس جانے کی تردید یا تصدیق نہیں کی۔
سابق وفاقی وزیر نے کہا کہ میں بانی پی ٹی آئی کی جان بچانے کے لئے ہی یہ سب کررہا ہوں، اب عمران خان کو یہ سمجھ لینا چاہیے کہ میں ان کی زندگی کیلیے ہی کام کررہا ہوں، میرا مسئلہ ریاست، حکومت اور سیاست نہیں بلکہ ایک ہی مقصد ہے کہ بشری بی بی اور ان کے حواریوں سے عمران خان کی جان کو بچائوں اور ملک سے انتشار اور تقسیم کو ختم کردوں۔
انہوں نے کہا کہ میں چھ ممالک کے دورے پر جارہا ہوں اور وہاں پر جاکر بھی عمران خان کی جان کو لاحق خطرات کے حوالے سے بتائوں گا۔
