ویب ڈیسک: سپریم کورٹ میں جوڈیشل کمیشن کے 2 اجلاس آج طلب کر لئے گئے ہیں، جس کی صدارت چیف جسٹس پاکستان جسٹس یحییٰ آفریدی کرینگے ۔ جوڈیشل کمیشن کے ایک اجلاس میں سندھ اور پشاور ہائیکورٹ ججز کی تقرری کا معاملہ زیر غور آئے گا۔
اس حوالے سے بتایا گیا ہے کہ سندھ ہائیکورٹ میں ججز تقرریوں کیلئے 13 ناموں پر غور کیا جائے گا جبکہ پشاور ہائیکورٹ کیلئے تین ایڈیشنل سیشن ججز اور 6 وکلا کے نام زیر غور آئیں گے۔ دوسرے اجلاس میں جسٹس شاہد بلال کی آئینی بنچ میں شمولیت پر غور کیا جائے گا۔
جوڈیشل کمیشن کے 2 اجلاس آج طلب کئے گئے ہیں، جسٹس منصور علی شاہ، جسٹس منیب اختر، جسٹس امین الدین اور جسٹس جمال مندوخیل جوڈیشل کمیشن کا حصہ ہیں۔ وزیر قانون، اٹارنی جنرل، ممبر پاکستان بار اختر حسین، سینیٹر فاروق ایچ نائیک، شیخ آفتاب، خاتون ممبر روشن خورشید، اپوزیشن سے سینیٹر علی ظفر اور بیرسٹر گوہر شریک ہوں گے۔
یاد رہے کہ جسٹس منصور علی شاہ کے جوڈیشل کمیشن اجلاس مؤخر کرنے کیلئے گزشتہ روز دو خطوط سامنے آئے تھے، جسٹس منصورعلی شاہ کی جانب سے ایک خط چیف جسٹس یحییٰ آفریدی اور دوسرا خط جوڈیشل کمیشن کو لکھا گیا تھا۔ اپنے خطوط میں جسٹس منصور علی شاہ نے رولز بنائے بغیر ججز تعیناتی پر تحفظات کا اظہار کیا تھا۔
