ویب ڈیسک: محکمہ موسمیات کی جانب سے ملک کے مختلف علاقوں میں آج سے بارش کی پیشگوئی کرتے ہوئے پہاڑوں پر برفباری کا امکان ظاہر کیا گیا ہے۔
محکمہ موسمیات کے مطابق سندھ، بلوچستان اور پنجاب کے مختلف علاقوں میں ٹھنڈی اور تیز ہوائیں چلنے اور پہاڑوں پر برفباری کا امکان ہے۔ آج سے مغربی ہوائیں ملک کے بالائی علاقوں میں داخل ہوں گی، مغربی ہواوں کے دخول کے پیش نظر آج سے 8 دسمبر کے دوران مری، گلیات، اسلام آباد، راولپنڈی اور لاہور سمیت پنجاب کے مختلف علاقوں میں بارش متوقع ہے۔
ادھر خیبرپختونخوا کے بالائی علاقوں چترال، دیر، سوات اور مالاکنڈ سمیت گلگت بلتستان اور آزاد کشمیر میں بھی بارش اور پہاڑوں پر برف باری کا امکان ظاہر کیا گیا ہے، اس کے ساتھ ساتھ ٹھنڈی ہوائیں چلنے کی پیشگوئی بھی کی گئی ہے۔
