ویب ڈیسک: پی آئی اے کی یورپ کیلئے پروازیں بحال ہو گئیں، 10جنوری کو پی آئی اے کی پرواز اسلام آباد سے پیرس روانہ ہوگی۔
تفصیلات کے مطابق پی آئی اے کارپوریٹ کمیونیکیشن ڈویژن کی جانب سے بتایا گیا ہے کہ پی آئی اے کی یورپ کیلئے پروازیں بحال ہو گئیں، اگلے سال 10جنوری کو پاکستان انٹرنیشنل ایئر لائن کی پرواز اسلام آباد سے پیرس کیلئَے اڑان بھرے گی۔
ترجمان پی آئی اے کے مطابق ابتدائی مرحلے میں ہفتہ وار 2 پروازیں آپریٹ کی جائیں گی، جن کو بتدریج بڑھایا جائے گا۔ پروازیں جمعہ اور اتوار کے دن اپریٹ کی جائیں گی، اس کے علاوہ پروازوں کا شیڈول مسافروں کی سہولت کے حساب سے انتہائی پرکشش رکھا گیا ہے۔
قومی ایئرلائن ترجمان کا کہنا ہے کہ اسلام آباد سے پرواز دن 11:30 بجے روانہ ہوگی اور سہ پہر 4 بجے پیرس پہنچے گی، پیرس سے پرواز شام 6 بجے روانہ ہوگی اور صبح 5 بجے اسلام آباد پہنچے گی، شیڈول کی سہولت ایسی ہے کہ مسافر ناشتہ پاکستان میں اور دوپہر کا کھانا پیرس میں کھائیں گے۔
