ویب ڈیسک: زلمی ویمن کرکٹ لیگ کا فائنل آج کھیلا جائیگا، ہزارہ ریجن نے پشاور تھنڈرز کی ٹیم کو شکست دے کر فائنل کیلئے کوالیفائی کرلیا۔
پشاور زلمی، زلمی فاؤنڈیشن اور ہائیر ایجوکیشن ڈپارٹمنٹ خیبرپختونخوا کے زیر اہتمام حیات آباد کرکٹ سٹیڈیم پشاور میں جاری زلمی ویمن کرکٹ لیگ کے پہلے سیمی فائنل میں ہزارہ کی ٹیم نے پشاور تھنڈرز کو 13 رنز سے ہرا کر فائنل کا ٹکٹ حاصل کر لیا۔
ہزارہ کی ٹیم نے پہلے کھیلتے ہوئے مقررہ اوورز میں 4 وکٹوں کے نقصان پر 75 رنز بنائے، جس میں مومنہ کی 46 رنز کی شاندار اننگز شامل تھی۔ پشاور تھنڈرز کی جانب سے عروج نے 2 جبکہ سنبل اور عانیہ نے ایک ایک وکٹ حاصل کی۔ پشاور تھنڈرز کی ٹیم ہزارہ کی ٹیم کے 76 رنز کے ہدف کے جواب میں 62 رنز بنا سکی۔
لیگ کا فائنل آج کھیلا جائیگا، فائنل اور اختتامی تقریب میں وزیر اعلیٰ خیبرپختونخوا علی امین گنڈاپور مہمان خصوصی ہوں گے۔ آج ایونٹ کے دوسرے سیمی فائنل میں ہزارہ ڈیفوڈلز کا مقابلہ پشاور آل سٹارز سے ہوگا جس کے بعد فائنل مقابلہ ہوگا۔ قبل ازیں پشاور تھنڈرز نے ڈی آئی خان کی ٹیم کو 62 رنز سے شکست سے دوچار کیا تھا اسی طرح ہزارہ نے مالاکنڈ ریجن کو 3 رنز سے شکست دی تھی۔
