ویب ڈیسک: وزیراعلیٰ خیبر پختونخوا سردار علی امین گنڈاپور نے ڈیرہ اسماعیل خان مِیں میدیا سے گفتگو کرتے ہوئے کہا ہے کہ ابھی سول نافرمانی کی تحریک کا فیصلہ نہیں ہوا، محمود غزنوی کی طرح حملہ کرتے رہیں گے۔
ان کا کہنا تھا کہ ڈی چوک میں ہمارے کارکنوں پر سیدھی فائرنگ کی گئی، حکومت نے دفعہ 245 لگا کر ہمارے لوگوں کا قتل کرایا، اس دوران ہمارے 12 ورکرز شہید ہوئے اور 107 کا ابھی تک پتہ نہیں۔
علی امین گنڈاپور نے کہا کہ میڈیا نے ہمارے شہداء کے جنازے نہیں دکھائے، لاپتہ ورکرز سے متعلق تحفظات ہیں، ہمارے ہزاروں کارکن گرفتار اور زخمی ہیں، کارکنوں کا خون رائیگاں نہیں جائے گا۔
ان کا کہنا تھا کہ سول نافرمانی تحریک کا فیصلہ نہیں ہوا، ہم پانی پت جنگ کی طرح حملے کریں گے، 5 حملے کر لیے ہیں، لیکن جس طرح محمود غزنوی نے 17 حملے کیے، ہم بھی اسی طرح حملے جاری رکھیں گے۔
انہوں نے کہا کہ کشمیر کی آزادی میں پشتونوں کا کردار نمایاں تھا، تو جب پشتون کشمیر آزاد کراتے ہیں تو ٹھیک اور اپنی آزادی کے لیے لڑیں تو غلط؟ فرنٹ لائن پر لڑتے ہیں اور لڑیں گے، نہ پہلے ہمارے دل میںخوف تھا نہ اب ہے، ہم شیر ہیں اور رہیںگے۔
