ویب ڈیسک:امریکہ کے نو منتخب صدر ڈونلڈ ٹرمپ نے بشار الاسد کے معاملے سے لاتعلقی کا اظہار کرتے ہوئے کہا ہے کہ ہمیں شام کی جنگ سے کوئی لینا دینا نہیں ہے ۔
تفصیلات کے مطابق شام میں بشار الاسد کی حکومت کے خاتمے کے بعد نو منتخب امریکی صدر کا بیان سامنے آگیا جس میں انہوں نے معاملے سے مکمل لاتعلقی کا اظہار کیا ہے ۔
صدرٹرمپ نے اپنے بیان میں کہا ہے کہ ہماری جنگ نہیں ہے، ہمیں شام کی جنگ سے کوئی لینا دینا نہیں ہے۔
واضح رہے کہ شامی باغی تنظیم حیات التحریر الشام چند روز کے دوران ملک کے اہم شہروں پر قبضہ کرنے کے بعد آج دارالحکومت دمشق کا کنٹرول سنبھالا تھا۔
شامی باغیوں نے سرکاری ٹی وی پر اپنے خطاب میں تمام سیاسی قیدیوں کی رہائی کا اعلان کرتے ہوئے کہا تھا کہ سیاہ دور کے خاتمے کے بعد نئے دور کا آغاز ہو گیا ہے، کسی کے خلاف بھی انتقامی کارروائی نہیں کی جائے گی، آزاد شام کی سلامتی اور خود مختاری کا تحفظ کیا جائے گا۔
شام پر باغیوں کے قبضے کے حوالے سے روسی وزیر خارجہ سرگئی لاروف نے قطر میں ترکیے اور ایران کے وزرائے خارجہ کے ساتھ ملاقات کے بعد کہا تھا کہ باغی گروپ حیات التحریر الشام کے عسکری آپریشن کی منصوبہ بندی طویل عرصے پہلے کی گئی تھی، یہ طاقت کا توازن بگاڑنے اور گرانڈ پر صورتِ حال تبدیل کرنے کی کوشش ہے۔
روسی وزیر خارجہ کا کہنا تھا روس باغی گروہ کی پیش قدمی کی ہر ممکن اقدام کے ذریعے مخالفت کرے گا۔
