ویب ڈیسک: وزیراعلیٰ خیبرپختونخوا سردار علی امین گنڈاپور نے عالمی یوم انسداد کرپشن کے حوالے سے کہا ہے کہ صوبائی حکومت کرپشن کیخلاف زیرو ٹالرنس پالیسی پر عمل پیرا ہے، کرپشن ایک ناسور ہے جس کے ہوتے ہوئے قوم کبھی ترقی نہیں کر سکتی۔
عالمی یوم انسداد بد عنوانی کے موقع پر وزیر اعلیٰ خیبر پختونخوا علی امین خان گنڈاپور نے اپنے خصوصی پیغام میں کہا ہے کہ ہر سال 9 دسمبر کو بدعنوانی کے خاتمے کا عالمی دن منایا جاتا ہے، جس کا مقصد بدعنوانی کے خلاف آگاہی پیدا کرنا ہے، ان کا کہنا تھا کہ بدعنوانی کے نتیجے میں نہ صرف قومی سطح پر ترقی کا عمل متاثر ہوتا ہے بلکہ سماجی عدم مساوات میں بھی اضافہ ہوتا ہے۔
انہوں نے کہا کہ موجودہ صوبائی حکومت شروع دن سے کرپشن کیخلاف زیرو ٹالرنس پالیسی پر عمل پیرا ہے، عوامی خدمات کے شعبوں میں شفافیت، احتساب اور جوابدہی کے ماحول کو فروغ دیا جا رہا ہے تاکہ بدعنوانی کا خاتمہ ہو، وزیراعلیٰ کا کہنا تھا کہ صوبائی حکومت نے معلومات اور خدمات تک رسائی کے قوانین نافذ کر رکھے ہیں، یہ قوانین سرکاری محکموں میں بدعنوانی کو لگام ڈالنے میں کافی معاون ثابت ہوئے ہیں۔
وزیر اعلیٰ سردار علی امین گنڈاپور نے کہا کہ موجودہ صوبائی حکومت نے ایک نئے اقدام کے طور پر "اختیار عوام کا” پورٹل کا اجراءکردیا ہے، تاکہ عوام سرکاری محکموں اور اداروں سے متعلق اپنی شکایات براہ راست وزیراعلیٰ اور دیگر اعلیٰ حکام تک پہنچا سکیں، انہوں نے بتایا کہ اس پورٹل کے ذریعے اب تک ہزاروں شکایات درج کرائی جا چکی ہیں، جن میں سے بیشتر حل کر دی گئی ہیں۔
