ویب ڈیسک: وزیراعظم شہباز شریف نے کہا ہے کہ یقینی بنایا جائے اسلام آباد میں ہنگامہ آرائی کرنے والے انتشاریوں کیخلاف کارروائی میں کوئی بے گناہ شہری گرفتار نہ ہو۔
امن و امان کی صورتحال پر منعقدہ اعلیٰ سطحی اجلاس سے خطاب کرتے ہوئے وزیراعظم نے ہدایت کی کہ ہنگامہ آرائی کرنے والوں کیخلاف سخت کارروائی کیلئے اقدامات تیز کیے جائیں ۔
وزیر اعظم کی زیر صدارت اجلاس میں میں وفاقی وزیر اقتصادی امور احد خان چیمہ ،وفاقی وزیر داخلہ محسن نقوی، وفاقی وزیر قانون اعظم نذیر تارڑ ، عطا اللہ تارڑ ، رانا ثنا اللہ و دیگر نے شرکت کی ۔
وزیراعظم شہباز شریف نے شرکاء سے بات چیت کرتے ہوئے کہا کہ کسی کو اجازت نہیں دیں گے کہ وہ انتشار پھیلا کر تیزی سے مستحکم ہوتی معیشت کو سبوتاژ کرنے کی سازش کرے، اسلام آباد میں گزشتہ دنوں ہنگامہ آرائی، توڑ پھوڑ، سرکاری اور نجی املاک کو نقصان پہنچانے والوں کے خلاف سخت کاروائی کے لئے اقدامات تیز کئے جائیں۔
وزیراعظم نے ہدایت کی کہ اس بات کو یقینی بنایا جائے کہ انتشار پھیلانے والوں کے خلاف کارروائی کے دوران کوئی بے گناہ اور معصوم شہری گرفتار نہ ہو۔
میاں شہباز شریف نے انتشار اور فساد پھیلانے والوں کی نشاندہی کا عمل مثر بنانے اور ان کے خلاف ٹھوس ثبوت حاصل کرنے کی ہدایت کرتے ہوئے فساد پھیلانے والوں کے خلاف قائم کی گئی ٹاسک فورس کو ہر ممکن وسائل فراہم کرنے کا حکم دیا۔
