ویب ڈیسک: سپریم کورٹ آف پاکستان کے آئینی بینچ نے بانی پی ٹی آئی عمران خان کی 9مئی واقعات کی جوڈیشل انکوائری کی درخواست سماعت کے لیے منظور کر لی۔
سپریم کورٹ کے آئینی بینچ نے 9 مئی واقعے کی عدالتی تحقیقات کے لیے بانی پی ٹی آئی کی درخواست پر سماعت کی، اس سلسلے میں ایڈیشنل اٹارنی جنرل اور عمران خان کے وکیل عدالت میں پیش ہوئے۔ دوران سماعت ایڈیشنل اٹارنی جنرل نے کہا کہ درخواست عوامی اہمیت کی نہیں اور اس پر اعتراضات ہیں۔
اس موقع پر عدالت نے درخواست پر رجسٹرار آفس کے اعتراضات ختم کرتے ہوئے اسے سماعت کے لیے مقرر کرنے کی ہدایت کر دی۔ بانی پی ٹی آئی کے وکیل حامد خان نے کہا کہ ڈیڑھ سال ہو چکا، پتہ تو کرائیں 9 مئی کو ہوا کیا تھا؟ 9 مئی کے بعد سینکڑوں مقدمات ہوئے، ایک سیاسی جماعت کو دیوار سے لگا دیا گیا۔
اس پر جسٹس جمال مندوخیل نے سوال کیا کہ آپ نے ہائیکورٹ سے رجوع کیوں نہیں کیا؟ حامد خان نے کہا کہ یہ کسی صوبے کا نہیں پورے ملک کا معاملہ ہے، اسی لیے سپریم کورٹ سے رجوع کیا۔ جسٹس جمال مندوخیل نے استفسار کیا کہ ابھی صرف رجسٹرار آفس کے اعتراضات ختم کر رہے ہیں، میرٹس پر کیس نہیں سنا، کیس دوبارہ مقررہونے پر اٹھائے گئے سوالات پر عدالت کو مطمئن کرنا ہوگا۔
دوران سماعت جسٹس مسرت ہلالی نے ریمارکس دیے کہ اگر کمیشن بن بھی گیا تو صرف ذمہ داری ہی فکس کرے گا، جوڈیشل کمیشن رپورٹ کا فوجداری مقدمات پر اثر نہیں پڑے گا۔ بعد ازاں سپریم کورٹ کے آئینی بینچ نے کیس کی مزید سماعت غیر معینہ مدت تک ملتوی کر دی۔
یاد رہے کہ سپریم کورٹ آف پاکستان کے آئینی بینچ نے بانی پی ٹی آئی عمران خان کی 9مئی واقعات کی جوڈیشل انکوائری کی درخواست سماعت کے لیے منظور کر لی۔
