ویب ڈیسک: پاکستان تحریک انصاف کے چیئرمین بیرسٹر گوہر نے کہا ہے کہ ہمارے لوگوں کے ساتھ زیادتی ہوئی، ان پر گولیاں چلائی گئیں، ہمیں دوبارہ سڑکوں پر آنے پر مجبور نہ کیا جائے، بس اب بہت ہوگیا! اب 9 مئی کی دھول بیٹھنی چاہیے۔
قومی اسمبلی میں اظہار خیال کرتے ہوئے چیئرمین پی تی آئی بیرسٹر گوہر کا کہنا تھا کہ ہم اس ایوان میں مذاکرات کر کے اپنے اوپر ہونے والے ظلم کا حساب چاہتے ہیں، ہم نے مذاکرات کیلئے کمیٹی بنائی ہے، اسے کمزوری نہ سمجھا جائے۔
انہوں نے کہا کہ یہ جمہوریت کا حصہ ہے کہ عوام سڑکوں پر احتجاج کرتے ہیں، ہمارے لوگوں کے ساتھ زیادتی ہوئی، ان پر گولیاں چلائی گئیں، دنیا میں کہیں بھی پرامن مظاہرین پر گولیاں نہیں چلیں۔ حالیہ دنوں میں برازیل سمیت کتنے ہی ممالک میں لوگ ایوانوں میں داخل ہوگئے کیا وہاں گولی چلی؟
انہوں نے کہا کہ اگر مذاکرات کے ذریعے ہمیں راستہ نہ دیا گیا، ہمارے مطالبات پر توجہ نہ دی گئِی، تو پھر سے سڑکوں پر آئیں گے، ہمیں بار بار سڑکوں پر آنے پر مجبور نہ کیا جائے، انہوں نے پارلیمانی کمیٹی کا اجلاس بلانے کا مشورہ دیتے ہوئے کہا کہ بس بہت ہو گیا، اب 9 مئی کی دھول بٹھائیں اور اس پر کمیشن بنائیں۔
بیرسٹر گوہر کا کہنا تھا کہ آپ کی پارلیمان کے سامنے گولی چلی، وزیر دفاع نے عجیب منطق دی کہ گولی علی امین گنڈاپور کے گارڈز نے چلائی، یہ عجیب بات ہے کہ حکومت یہ ماننے کو تیار نہیں کہ گولی بھی چلی۔ ہمیں پشتون کارڈ استعمال کرنے کا طعنہ دیا جاتا ہے، ہمارے لوگ جو احتجاج پر آئے تھے غیر مسلح تھے، ہم پشتون کارڈ استعمال نہیں کر رہے، آپ وہ ویڈیوز سامنے لائیں جن میں پی ٹی آئی کے لوگوں نے کسی قسم کا اسلحہ استعمال کیا ہو۔
انہوں نے مزید کہا کہ عمران خان کو مقبولیت کیلئے جلسے جلوس نکالنے کی ضرورت نہیں، 8 فروری کو ان کی مقبولیت ثابت ہو چکی ہے۔ ہمیں دوبارہ سڑکوں پر آنے پر مجبور نہ کیا جائے، بلکہ یہ ایوان ہمیں انصاف دے۔
