ویب ڈیسک: وزیراعلیٰ خیبرپختونخوا سردار علی امین گنڈاپور نے کہا ہے کہ فیڈرل پی ایس ڈی پی کے تحت صوبہ میں منصوبوں کی تکمیل ضروری ہے۔
تفصیلات کے مطابق وزیر اعلی خیبرپختونخوا علی امین گنڈاپور سے چیئرمین پرائم منسٹر انسپکشن کمیشن بریگیڈیئر ریٹائرڈ مظفر علی رانجھا نے ملاقات کی۔ اس دوران صوبے میں فیڈرل پی ایس ڈی پی کے تحت ترقیاتی منصوبوں سے متعلق امور پر تبادلہ خیال کیا گیا۔ چیف سیکرٹری، ایڈیشنل چیف سیکرٹریز اور دیگر متعلقہ حکام بھی ملاقات میں موجود تھے۔
ملاقات میں ترقیاتی منصوبوں پر کام کی رفتار کو تیز کرکے ان کی جلد تکمیل کو یقینی بنانے پر اتفاق کیا گیا۔ اس موقع پر منصوبوں پر عملدرآمد کی راہ میں حائل رکاوٹوں کو دور کرنے کے لئے متعلقہ محکموں کے درمیان بہتر کوآرڈینیشن کی ضرورت پر زور دیا گیا۔
متعلقہ وفاقی اور صوبائی محکموں کو اس سلسلے میں ضروری اقدامات کی ہدایت کی گئی۔ ان منصوبوں میں چترال شندور روڈ، پشاور ناردرن بائی پاس، سی آر بی سی ، ہنگو روڈ اور دیگر اہم منصوبے شامل ہیں۔
وزیراعلیٰ خیبرپختونخوا سردار علی امین گنڈاپور نے کہا کہ فیڈرل پی ایس ڈی پی کے تحت صوبہ میں منصوبوں کی تکمیل ضروری ہے، صوبہ میں جاری یہ منصوبے عوامی فلاح و بہبود کے اہم منصوبے ہیں، ان کی تکمیل کے لئے صوبائی حکومت اپنے حصے کی ذمہ داری ہر صورت پوری کرے گی۔
انہوں نے کہا کہ سی آر بی سی لفٹ کینال کا منصوبہ نہ صرف صوبے بلکہ ملک کی فوڈ سکیورٹی کے لئے اہم منصوبہ ہے، وفاقی حکومت اس منصوبے پر عملدرآمد کے لئے اپنے حصے کا کردار ادا کرے۔
بریگیڈیئر مظفر رانجھا کا کہنا تھا کہ خیبر پختونخوا میں فیڈرل پی ایس ڈی پی کے تحت صوبہ میں منصوبوں کی تکمیل یقینی بنائی جائے گی، یہ عوامی فلاح و بہبود کے منصوبے ہیں، انہیں ترجیحی بنیادوں پر مکمل کیا جائے گا۔
