ویب ڈیسک: شمالی وزیرستان میں سکیورٹی فورسز کی کارروائیوں کے دوران جہاں ایک طرف 7دہشتگرد ہلاک ہوئے، وہیں ان کارروائیوں میں ایک جوان شہید بھِی ہوا۔
پاک فوج کے شعبہ تعلقات عامہ (آئی ایس پی آر) کے مطابق شمالی وزیرستان میں سکیورٹی فورسز کی دو الگ الگ کارروائیوں میں 7 دہشتگرد ہلاک کر دیئے گئے، جبکہ مقابلہ میں لانس نائیک شہید ہو گیا۔
آئی ایس پی آر کے مطابق سکیورٹی فورسز کی جانب سے کارروائیاں 10 اور 11 دسمبر کو کی گئیں، میران شاہ میں دہشت گردوں کی موجودگی کی خفیہ اطلاع پر کارروائی کے دوران 4 دہشت گردوں کو ہلاک کر دیا گیا۔
پاک فوج کے شعبہ تعلقات عامہ کے مطابق سپین میں ایک اور کارروائی کے دوران مزید 3 دہشت گردوں کو ہلاک کر دیا گیا، شدید فائرنگ کے تبادلے میں لانس نائیک محمد امین بہادری سے لڑتے ہوئے شہید ہو گیا۔
آئی ایس پی آر کے مطابق 34 سالہ لانس نائیک محمد امین کا تعلق فیصل آباد سے ہے، علاقے میں دیگر ممکنہ دہشت گردوں کے خاتمے کیلئے سینی ٹائزیشن آپریشن جاری ہے۔
پاک فوج کے شعبہ تعلقات عامہ کے مطابق سکیورٹی فورسز ملک سے دہشت گردی کے خاتمے کیلئے پُرعزم ہیں، ہمارے بہادر فوجیوں کی ایسی قربانیاں ہمارے عزم کو تقویت دیتی ہیں۔
