ویب ڈیسک: امریکہ کی جانب سے ایک بار پھر غزہ جنگ بندی کا ڈھنڈورا پیٹا جانے لگا ہے۔ امریکی قومی سلامتی کے مشیر جیک سلیوان نے کہا ہے کہ غزہ میں جنگ بندی معاہدے کے قریب پہنچ چکے ہیں۔
جیک سیلوان نے کہا کہ غزہ جنگ بندی میں اسرائیل اور حماس آمادہ نظر آتے ہیں، اس لئے اُمید ہے کہ جنگ بندی اسی ماہ ہو جائے۔ انہوں نے کہا کہ لبنان میں جنگ بندی کے بعد حماس کا مؤقف بدل گیا ہے، موجودہ امریکی صدر جوبائیڈن اور نومنتخب صدر ڈونلڈ ٹرمپ کی ٹیمیں غزہ میں جاری جنگ روکنے کیلئے پیشہ ورانہ اور سنجیدہ انداز میں مصروف ہیں۔
انہوں نے مزید کہا کہ اسرائیلی وزیراعظم جنگ بندی کیلئے ٹرمپ کے اقتدار سنبھالنے کا انتظار نہیں کر رہے، جنگ بندی کے بعد قیدیوں کی واپسی اور بڑے پیمانے پر غزہ میں انسانی امداد کی اجازت ہو گی۔ انہوں نے مزید بتایا کہ جنگ بندی معاہدے کے قریب ہیں، جلد ہی جاری جنگ رک جائے گی۔
