ویب ڈیسک: اقوام متحدہ کے سیکرٹری جنرل انتونیو گوتریس نے شام کے حوالے سے کہا ہے کہ شام میں اقلیتوں کے حقوق کا احترام کیا جائے۔ شام کی عوام اپنی قسمت کا انتخاب خود کرے گی۔
جنوبی افریقہ کے شہر پریٹوریا میں صحافیوں سے بات چیت کرتے ہوئے انہوں نے کہا کہ بشار الاسد کی حکومت کا خاتمہ مشرق وسطیٰ میں امید کی ایک کرن ہی قرار دی جا سکتی ہے، ان کا کہنا تھا کہ اب اس کے بعد سیاسی منتقلی منظم انداز میں کی جائے، اور شام میں اقلیتوں کے حقوق کا احترام کیا جائے۔
انتونیو گوتریس نے مزید بتایا کہ اقوام متحدہ شام میں ایک جامع سیاسی عمل کے ساتھ اقتدار کی ہموار منتقلی کی حمایت کے لئے پوری طرح پرعزم ہے، جس میں تمام اقلیتوں کے حقوق کا مکمل احترام کیا جائے گا، اور اس کی علاقائی سالمیت کو مکمل طور پر بحال کرنے کے ساتھ ایک متحدہ خودمختار شام کی طرف راہ ہموار کی جائے گا۔
اقوام متحدہ کے سیکرٹری جنرل نے کہا کہ شام کے ساتھ ساتھ فلسطینی عوام کے حق خود ارادیت اور ریاست کا مستقل ہونا بھی ناگیزیر ہو چکا ہے، شام کے لیے ان کے خصوصی ایلچی گیئر پیڈرسن آگے بڑھنے کے لیے پوری کوشش کر رہے ہیں، ایسے میں وہ تمام فریقین کے ساتھ بات چیت کر رہے ہیں۔
