ویب ڈیسک: وزیراعظم کے مشیر اور مسلم لیگ نون کے رہنما رانا ثناء اللہ نے پی ٹی آئی سے مذاکرت کے حوالے سے کہا ہے کہ پاکستان تحریک انصاف سے آفر کی ہے کہ صدق دل سے معذرت کریں، آخر 9مئی واقعات پر پی ٹی آئی والے معذرت کیوں نہیں کرتے، مڈمت کیوں نہیںکرتے ، کیوں نہیں کہتے کہ ان سے غلطی ہوئی ہے۔
انہوں نے ایک سوال کے جواب میں کہا ہے کہ پاکستان تحریک انصاف نے مذاکرات کیلئے کمیٹی بنائی ہے لیکن مذاکرات کا پیغام نہیں بھیجا، مذاکرات کا پیغام ملا تو ہماری طرف سے انکار نہیں ہوگا، انہوں نے واضح کیا کہ پی ٹی آئی کی فائنل کال سے پہلے تحریک انصاف سے رابطہ ہوا تھا، لیکن اس میں عمران خان کی رہائی کی بات نہیں ہوئی تھی۔
ان کا کہنا تھا کہ پی ٹی آئی کی جانب سے یہ کہنا کہ 9 مئی کو ہم نہیں تھے، یہ تو اور تلخی بڑھانے کی بات ہے، تحریک انصاف نے مذاکرات کیلئے کمیٹی بنائی ہے لیکن بات چیت کا پیغام نہیں دیا، تحریک انصاف کا ہمارے لئے ابھی یہی پیغام ہے کہ ہم آپ سے کیوں مذاکرات کریں۔ یہاں سوال یہ پیدا ہوتا ہے کہ آخر 9مئی واقعات پر پی ٹی آئی والے معذرت کیوں نہیں کرتے، کیوں نہیں کہتے کہ ان سے غلطی ہوئی ہے۔
رانا ثناء اللہ نے کہا کہ مدارس رجسٹریشن کا معاملہ بیٹھ کر سلجھایا جا سکتا ہے، مدارس رجسٹریشن کے معاملے میں کوئی ڈیڈ لاک والی بات نظر نہیں آ رہی، سوسائٹی ایکٹ یا وزارت تعلیم سے رجسٹرڈ ہونے سے کوئی فرق نہیں پڑتا۔
