ویب ڈیسک: پشاور ہائی کورٹَ میں ضلع کرم میں مخدوش امن وامان صورتحال کیخلاف درخواست دائر کر دی گئی ہے۔
خیبر پختونخوا کے ضلع کرم میں امن و امان کی مخدوش صورتحال کا سامنا کرنا پڑ رہا ہے، ان حالات کے باعث گزشتہ 2 ماہ سے راستوں کی بندش الگ سے مسئلہ بنا ہوا ہے، جس سے شہریوں کو کئی مشکلات کا سامنا کرنا پڑ رہا ہے، حالات سے تنگ آکر کرم کے شہری نے پشاور ہائیکورٹ سے رجوع کر لیا۔
مقامی شہری کی جانب سے پشاور ہائیکورٹ میں دائر درخواست میں صوبائی حکومت، وفاقی حکومت اور وفاقی محکمہ داخلہ سمیت دیگر کو فریق بنایا گیا ہے۔ درخواست میں مؤقف اختیار کیا گیا ہے کہ کرم میں سٹرکوں کی بندش، صحت کی بنیادی سہولیات سے شہری محروم ہیں۔
درخواست گزار نے موقف اختیار کیا کہ کرم میں مخدوش امن وامان صورتحال کے باعث شہری نہ ضلع کرم سے آسکتے ہیں اور نہ ہی جاسکتے ہیں۔ ٹرانسپورٹ اور موبائل سروس بھی بند ہے، گزشتہ 2 سے 3 مہینوں سے ضلع کرم میں معمولاتِ زندگی شدید متاثر ہیں۔
انہوں نے مزید بتایا ہے کہ راستے بند ہونے کی وجہ سے خوراک کی شدید قلت پیدا ہوگئی ہے، ضلع کرم کے شہری بنیادی حقوق سے محروم ہیں۔ درخواست میں عدالت سے استدعا کی گئی ہے کہ ضلع کرم میں امن و امان بحال کرکے مراکز صحت اور تعلیمی ادارے کھولے جائیں۔
