ویب ڈیسک: پی ٹی آئی سینیٹر بیرسٹر علی ظفر نے پارلیمنٹ کے باہر میڈیا سے گفتگو کرتے ہوئے کہا ہے کہ دو تین دن سے یہ تاثر دیا جا رہا کہ ہم مذاکرات کے لیے مجبور ہیں، ہم بھیک نہیں مانگ رہے، بلکہ مذاکرات کیلئَے ہمارے دروازے کھلے ہیں، اور ہمیشہ سے کھے رہے ہیں۔
انہوں نے کہا کہ بانی پی ٹی آئی نے کہا ہے کہ مذاکرات کا یہ طریقہ نہیں ہوتا، بانی پی ٹی آئی نے کہا ہم کسی سے بھیک نہیں مانگ رہے ہیں، لیکن ہر بار ہم پر الزام لگایا جاتا ہے کہ ہم نے مذاکرات کے دروازے بند کیے ہیں، یہ تاثر غلط ہے۔
ان کا کہنا تھا کہ ہم نے مذاکرات کے دروازے کھولے ہیں، بس صرف دو شرائط رکھی ہیں، وہ پوری کریں ہم مذاکرات کریں گے، اس حوالے سے انہوں نے بتایا کہ ہماری پہلی شرط 24-25 اور 26 نومبر احتجاج پر جو ہوا اس پر کمیشن بنایا جائے، دوسری شرط بغیر کسی وجہ کے جن ورکرز کو جیل میں رکھا ہوا ہے ان کو رہا کیا جائے۔
پی ٹی آئی رہنما نے کہا کہ اگر یہ دو شرائط مانتے ہیں تو مذاکرات کے دروازے کھلے ہیں، اگر پارلیمانی کمیٹی بات کرنا چاہتی ہے تو اس پر بھی ہمیں کوئی اعتراض نہیں، جس کے پاس بات کرنے کا اختیار ہے، وہ آئے ہم بات کرنے کو تیار ہیں۔
