ویب ڈیسک: جے یو آئی پاکستان کے ترجمان اسلم غوری نے کہا ہے کہ مدارس بل پر صدر آصف علی زرداری کے اعتراضات حیران کن ہیں، اعتراضات کا طریقہ قانون کے مطابق نہیں۔
اسلم غوری نے کہا کہ اعتراضات سپیکر قومی اسمبلی کو بھیجنے چاہئیں تھے، ان کے پاس یہ اعتراضات نہیں بھیجے گئے۔ جو اعتراض سپیکر کو بھیجا گیا تھا، اس کا جواب دے دیا گیا تھا۔
ترجمان جے یو آئی کا کہنا تھا کہ صدر مملکت کے اعتراضات آئین میں دی گئی مدت کے اندر نہیں، اعتراضات قسطوں میں کئے گئے، ایک بار اعتراضات کئے ان کا جواب دیا گیا، دوبارہ اعتراضات کا حق نہیں۔
انہوں نے کہا کہ سپیکر آفس کے جواب پر ایوان صدر نے اپنے اعتراضات پر دوبارہ زور نہیں دیا، صدر کی جانب سے مجوزہ ترمیم پر اعتراض کے ساتھ تجاویز اور حل بھی بھیجا جاتا ہے۔
اسلم غوری نے کہا کہ مدارس بل میں کوئی تجاویز اور حل نہیں بتایا جا رہا، لگتا ہے کہ ایوان صدر بیرونی دبا ؤکا شکار ہے۔
