ویب ڈیسک: پاکستان تحریک انصاف کے چیئرمین بیرسٹر گوہر نے کہا ہے کہ ہم نے مذاکرات کیلئے شرائط نہیں مطالبات رکھے ہیں، مذاکرات ضرور ہونے چاہئیں، سیاسی مسائل کا حل سیاسی بیٹھک سے ہی ہوتا ہے۔
ڈسٹرکٹ کورٹس اسلام آباد میں میڈیا سے گفتگو کرتے ہوئے انہوں نے کہا کہ مذاکرات کے حوالے سے اس سے قبل بھی بانی پی ٹی آئی نے کہا تھا، تحریک انصاف مذاکرات کی حامی ہے، کیونکہ اس سے تمام مسائل حل ہوتے ہیں، ہم پر مذاکرات کیلئے شرائط رکھنے کا الزام درست نہیں۔
انہوں نے مزید کہا کہ اس سے قبل بھی مذاکرات ہوئے لیکن ایک سٹیج سے قبل رابطہ ختم ہوگیا، بس بہت ہوگیا اب ملک کو بہتری کی طرف بڑھنا چاہیے۔ ہم نے مذاکرات کیلئَے شرائط نہیں مطالبات رکھے ہیں۔
ڈسٹرکٹ اینڈ سیشن کورٹس اسلام آباد میں پی ٹی آئی قیادت کے خلاف اسلام آباد میں احتجاج پر تھانہ کراچی کمپنی میں مقدمات کی سماعت جوڈیشل مجسٹریٹ شہزاد خان نے کی، بیرسٹر گوہر اپنے وکلاء سردار مصروف، آمنہ علی اور مرتضیٰ طوری ایڈووکیٹ کے ہمراہ پیش ہوئے۔
جج شہزاد خان نے سماعت کے دوران ریمارکس دیتے ہوئے کہا کہ ان مقدمات میں دیگر 7 ملزمان بھی نامزد ہیں، مجھے امتحان میں نہ ڈالیں۔ ایڈووکیٹ سردار مصروف نے کہا کہ دیگر ملزمان کا علم نہیں، کب پیش ہوں جس پر جج شہزاد خان نے ریمارکس دیئے کہ بیرسٹر گوہر کی حد تک حاضری استثنیٰ کی درخواست دائر کر دیا کریں، منظور کر لیا کروں گا۔
بعدازاں عدالت نے مقدمے میں نامزد دیگر ملزمان کو درخواست بریت دائر کرنے کی ہدایت کرتے ہوئے کیس کی سماعت ملتوی کر دی۔
