ویب ڈیسک: وفاقی حکومت نے پاکستان تحریک انصاف کے بانی چیئرمین اور سابق وزیراعظم عمران خان کے ملٹری ٹرائل کا عندیہ دے دیا ۔
وزیراعظم کے مشیر برائے سیاسی امور رانا ثنا اللہ کا اس حوالے سے اپنے انٹرویو میں کہنا تھا کہ عمران خان کی تقاریر نے ملک میں معاشی افراتفری اور 9مئی کے فسادات کو جنم دیا تھا ، فوجی عدالتیں 9مئی کے واقعے سے متعلق ایک ہفتے میں فیصلہ سنائیں گی۔
انہوں نے کہا کہ ممکن ہے کہ بانی پی ٹی آئی عمران خان عمران خان کا ملٹری ٹرائل ہو ، سیاسی ڈائیلاگ ہونے چاہئیں کیونکہ سیاسی مسائل کے حل کا ڈائیلاگ کے علاوہ کوئی طریقہ نہیں۔
رانا ثنا نے 9مئی کے فسادات کے لئے بانی پی ٹی آئی کو جوابدہ ٹھہرانے کا عزم ظاہر کرتے ہوئے کہا کہ اگر عمران خان اس توڑ پھوڑ کے مرتکب پائے گئے تو ان کے خلاف ملٹری ایکٹ کے تحت قانونی چارہ جوئی کی جائیگی۔
پی ٹی آئی کا دوسرا نام عمران خان ہے کیونکہ ان کی اجازت کے بغیر پی ٹی آئی میں کوئی کچھ نہیں کر سکتا،عمران خان اپنی رہائی کے علاوہ کسی قسم کی گفتگو بڑھانے کے موڈ میں نہیں۔
رانا ثنا نے مدارس رجسٹریشن بل کے معاملے پر کہا کہ مولانا فضل الرحمن جو بات کر رہے ہیں ان کی بات میں وزن ہے ، مدارس رجسٹریشن بل کا مسئلہ اتنا بڑا نہیں کچھ دنوں میں حل ہو جائیگا۔
