ویب ڈیسک: وزیراعظم میاں شہباز شریف نے کہا ہے کہ انسانی سمگلنگ ایک اندوہناک جرم ہے جس کی روک تھام انتہائی ناگزیر ہے ۔
وزیراعظم محمد شہباز شریف نے یونان میں ہونے والے کشتی حادثے میں پاکستانیوں کی اموات پر اظہار افسوس کرتے ہوئے اس سلسلے میں تمام ضروری اقدامات اٹھانے کی ہدایت کی ہے۔
شہباز شریف کا اس حوالے سے کہنا تھا کہ انسانی سمگلنگ ایک اندوہناک جرم ہے جس کی وجہ سے کئی افراد کی جانیں جاتی ہیں اور ہر سال کئی گھر اجڑ جاتے ہیں۔
انہوں نے کہا کہ انسانی سمگلر ایک ایسا ظالم مافیا ہے جو غریب عوام کوجھوٹے اور سنہری خواب دکھا کر ان سے پیسے بٹورتا ہے۔
وزیر اعظم نے وزیر داخلہ محسن نقوی کو واقعہ کی انکوائری رپورٹ جلد پیش کرنے کی ہدایت کرتے ہوئے کہا کہ انسانی سمگلنگ میں ملوث افراد کی شناخت کی جائے اور ان کو سخت سزائیں دی جائیں تاکہ وہ ایسے قبیح فعل کو نہ دھرائیں، ایسے واقعات کے مستقبل میں تدارک کے لئے ٹھوس اقدامات اٹھائے جائیں۔
دوسری جانب صدر مملکت آصف علی زرداری نے بھی یونان کے قریب کشتی کے حادثے میں قیمتی جانی نقصان پر اظہار افسوس کیا ہے۔
صدر مملکت آصف علی زرداری کا کہنا تھا کہ انسانی سمگلنگ ایک قبیح عمل، لوگ اپنے پیاروں کو کھو دیتے ہیں، انہوں نے اِنسانی سمگلنگ کے تدارک کیلئے اقدامات تیز کرنے کی ضرورت پر زور دیا۔
