ویب ڈیسک: پی ٹی آئی کے چیئرمین بیرسٹر گوہر نے کہا ہے کہ بات تب آگے بڑھے گی جب ہمارے مطالبات پر کھل کر بات ہو، سیاسی مسائل کا حل سیاسی طریقے سے ہی تلاش کرنا ہوگا۔
پارلیمنٹ ہائوس کے باہر میڈیا سے گفتگو کرتے ہوئے بیرسٹر گوہر کا کہنا تھا کہ ہم خود سے کوئی کام نہیں کرتے، ہم خان صاحب سے ہدایات لیتے ہیں، اور ان ہدایات پر عملدرآمد کرکے رپورٹ بانی پی ٹی آئی کے سامنے رکھتے ہیں۔
چیئرمین پی ٹی آئی نے کہا کہ مذاکرات کے لیے رابطے انشا اللہ ہو جائیں گے جس نے رابطہ کرنا ہے وہ رابطہ کرلیں گے،ہمارے شکوے شکایتیں دور کی جائیں۔
انہوں نے مزید کہا کہ عمران خان ہی باس ہیں وہ آرڈر کرتے ہیں، یہی ہماری پالیسی ہے اور یہی پی ٹی آئی کی پالیسی ہے، کسی کے پاس یہ حق نہیں ہے کہ وہ بانی ہی ٹی آئی کو ڈکٹیٹ کرے۔
بیرسٹر گوہر نے کہا کہ بانی پی ٹی آئی نے ہی کمیٹی بنائی اور کمیٹی کو مینڈیٹ دیا، اگر اس میں پیشرفت ہوجاتی ہے تو بہت اچھی بات ہے، انہوں نے کہا کہ سیاسی مسائل کا حل سیاسی طریقے سے ہی تلاش کرنا ہوگا۔
