ویب ڈیسک: حکومت خیبر پختونخوا کے مشیر اطلاعات و نشریات بیرسٹر ڈاکٹر سیف نے کہا ہے کہ جعلی حکومت دور سے کرم کے حالات دیکھ رہی ہے، حالات سدھارنے کی بجائے جعلی وفاقی حکومت کی دلچسپی فرقہ واریت اور صوبائیت کو ہوا دینے میں ہے، کرم بھی پاکستان کا حصہ ہے، ایران یا افغانستان کا نہیں، وزیر داخلہ کو سمجھایا جائے کہ آپ صرف اسلام آباد کے وزیر داخلہ نہیں، پورے ملک کے ہیں۔
انہوں نے کہا کہ ملک کے تمام اندرونی معاملات کے ذمہ دار وزیرداخلہ ہوتے ہیں، محسن نقوی کو صرف پی ٹی آئی کارکنوں کی پکڑ دھکڑ کا ٹھیکہ ملا ہے، اس سے نکل کر انہیں ملک کے دیگر علاقوں میں بھی اپنی ذمہ داریوں کا ادراک کرنا چاہئے، کرم کے سنگین حالات پر کوئی توجہ نہیں دی جا رہی۔
ان کا کہنا تھا کہ ضلع کرم ایک سرحدی علاقہ ہے، اس حوالے سے وزیر دفاع خواجہ آصف کی بھی کچھ ذمہ داریاں بنتی ہیں، جعلی وزیر دفاع بدتمیزانہ بیانات کی بجائے اپنی زمہ داری پر توجہ دیں۔ فارم 47 کی بجائے فارم 45 کے اصلی وزیراعظم ہوتے تو اب تک کرم کے لئے ایئر ایمبولینس کا انتظام ہو چکا ہوتا۔
بیرسٹر ڈاکٹر سیف نے مزید بتایا کہ وزیراعلیٰ سردار علی امین گنڈاپور اپنے ہیلی کاپٹر کو کرم کے لئے ایئر ایمبولینس کے طور پر استعمال کر رہے ہیں، جبکہ دوسری طرف مریم نواز کی جانب سے ائیر ایمبولنس کے دعوے تاحال حقیقت نہیں بنے، فارم 45 کے وزیراعلیٰ عملی کام پر یقین رکھتے ہیں جبکہ فارم 47 کی جعلی وزیراعلیٰ جھوٹے دعووں کا سہارا لیتی ہیں۔
