ویب ڈیسک: سپیکر قومی اسمبلی سردار ایاز صادق نے سپیکرز کانفرنس سے خطاب کرتے ہوئے کہا ہے کہ مذاکرات کے حل سے ہی جمہوریت آگے بڑھے گی، ہمارے دروازے ہمیشہ کھلے رہنے چاہئیں۔
ان کا کہنا تھا کہ کم بولنا اور درگزر کرنا سپیکرز کیلئے لازم ہے، سپیکر اور جج بہت ذمہ داری کا کام ہے، اس کی پکڑ بھی سخت ہوتی ہے۔ بطور سپیکر اتنے راز ہیں کہ اگر کہیں کہہ دوں تو بعض ممبران کو آئندہ ٹکٹ تک نہ ملے مگر یہ راز ہمارے سینے میں دفن ہیں۔
سپیکر قومی اسمبلی نے کہا کہ ایم این ایز کیساتھ ساتھ سابق ممبران کیلئے بھی ہمارے دروازے ہمیشہ کھلے رہنے چاہئیں۔ ہمیں اپنے اداروں کو مستحکم بنانا ہے، ہمیں مل جل کر تلخیوں کو کم کرنا ہوگا، مذاکرات ہی مسائل کا حل ہے، مذاکرات کے حل سے ہی جمہوریت آگے بڑھے گی اور مستحکم ہوگی۔
سردار ایاز صادق کا کہنا تھا کہ مسائل ہمیشہ مذاکرات کے ذریعے ہی حل ہوتے ہیں، ضروری نہیں ہے کہ ہر مسئلہ حل ہو جائے یا ہر شرط مانی جائے ، ہمیں ایک دوسرے کو عزت دینی ہے۔
