ویب ڈیسک: 24نومبر احتجاج کیس میں پشاور ہائی کورٹ نے 140سے زائد 140سے زائد پی ٹی آئی اراکین کی حفاظتی ضمانت منظور کر لی۔
تفصیلات کے مطابق پشاور ہائی کورٹ میں 28 نومبر سے اب تک پی ٹی آئی کے رہنماؤں اور ممبران اسمبلی کی 140 سے زائد درخواستوں پر سماعت ہوئی، اس دوران 24 نومبر کو ڈی چوک اسلام آباد میں پی ٹی آئی کے احتجاج کے بعد درج مقدمات میں 140سے زائد پی ٹی آئی اراکین کی حفاظتی ضمانت منظور کر لی گئی، ان میں پارٹی رہنما، ممبران اسمبلی اور کارکنان شامل ہیں۔
پشاور ہائی کورٹ میں 70 سے زائد راہداری ضمانت اور 69 حفاظتی ضمانت کی درخواستوں پر سماعت ہوئی، سماعت کے دوران تمام درخواست گزاروں کو راہداری اور حفاظتی ضمانتیں دے دی گئِیں۔ ان میں وزیراعلیٰ خیبرپختونخوا علی امین گنڈاپور، سیکرٹری جنرل سلمان اکرم راجا، اپوزیشن لیڈر قومی اسمبلی عمر ایوب شامل ہیں۔ بشریٰ بی بی کو بھی 16 جنوری تک حفاظتی ضمانت دیدی گئی۔
پشاور ہائی کورٹ سے حفاظتی ضمانت حاصل کرنے والوں میں ممبر قومی اسمبلی اسد قیصر، سینیٹر شبلی فراز، شیخ وقاص اکرم، شیرافضل مروت، جنید اکبر، شہریار آفریدی، عاطف خان، شہرام ترکئی، عادل بازئی، انور تاج، فیصل امین اور دیگر شامل ہیں۔ صوبائی وزرا آفتاب عالم، فیصل ترکئی، سہیل آفریدی اور دیگر نے بھی حفاظتی ضمانت حاصل کر لی۔
پی ٹی آئی کی خواتین رہنماوں میں شاندانہ گلزار، زرتاج گل، ثریا بی بی، سینیٹر فلک ناز، کنول شوزب، عالیہ حمزہ، صنم جاوید، خدیجہ شاہ، مشال یوسفزئی، حمیدہ شاہ کو بھی پشاور ہائیکورٹ نے راہداری اور حفاظتی ضمانتیں دیدیں۔
