ویب ڈیسک: پنجاب حکومت پر تنقید کرتے ہوئے گورنر پنجاب سردار سلیم حیدرخان نے کہا ہے کہ خدا گواہ ہے کہ پنجاب میں ایسا ہسپتال نہیں جہاں پر غریب کا فری علاج ہوسکے، یہ وہ سہولت ہے جو ہر غریب پاکستانی کا حق بنتا ہے۔ اگر وہ خاموش رہیں تو پنجاب میں کوئی اپوزیشن نہیں، بلاول بھٹو زرداری کو وزیراعظم بنائیں گے.
اٹک میں عوامی اجتماع سے خطاب کرتے ہوئے انہوں نے سندھ کی مثال دیتے ہوئے کہا کہ سندھ کے تمام ہسپتالوں میں غریب مریضوں کا علاج فری ہوتا ہے، چاہے مرض کتنا ہی بڑا کیوں نہ ہو۔ ترقیاتی منصوبے پورے پنجاب میں ہونے چاہئیں، صرف لاہور پنجاب نہیں ہے اٹک، چکوال، جہلم، راجن پور اور ڈی جی خان بھی پنجاب ہے۔
گورنر پنجاب کا کہنا تھا کہ عوام ہر چیز پر ٹیکس دے رہے ہیں، اس کے باوجود پنجاب کے حکمرانوں کی جانب سے عوام کو ریلیف دینے کے بلند و بانگ دعوے صرف فریب اور جھوٹے ثابت ہو رہے ہیں۔ حکومت کا سب سے بڑا فرض صحت اور تعلیم کی مفت سہولت فراہم کرنا ہوتا ہے، لیکن یہاں ایسی کوئی سہولت عوام کو میسر نہیں۔
سلیم حیدر خان کا کہنا تھا کہ اگر وہ خاموش رہیں تو پنجاب میں کوئی اپوزیشن نہیں، چیئرمین پیپلز پارٹی بلاول بھٹو زرداری کو وزیراعظم بنائیں گے، اس موقع پر اٹک کی مختلف یونین کونسلز سے مختلف برادریوں نے پی پی میں شمولیت کا اعلان کیا۔
