ویب ڈیسک: پشاور میں گزشتہ دنوں ہونے والے ایپکس کمیٹی کے اجلاس میں وزیراعلیٰ خیبر پختونخوا علی امین گنڈا پور نے وفاقی وزیر داخلہ محسن نقوی سے گلوے شکوے کئے ۔
ذرائع کے مطابق پشاور میں گزشتہ ہفتے ہونے والے صوبائی ایپکس کمیٹی کے اجلاس کی اندرونی کہانی سامنے آگئی جس میں وزیراعلیٰ علی امین گنڈا پور اور وفاقی وزیر داخلہ محسن نقوی کا رویہ دوستانہ رہا ۔
ذرائع کا بتانا ہے کہ محسن نقوی نے اجلاس میں کہا کہ قانون نافذ کرنے والے آپریشن والے علاقوں میں بھی عوام پر تشدد نہیں کرتے جس پر وزیراعلیٰ خیبر پختونخوا علی امین نے کہا کہ ایسے اہلکاروں کو ڈی چوک میں بھی تعینات کیا جاتا، وزیراعلیٰ کے جواب پر وفاقی وزیر داخلہ محسن نقوی مسکرائے۔
ذرائع کے مطابق وزیراعلیٰ علی امین گنڈا پور اجلاس میں کہا کہ دہشتگردی سمیت صوبے کو مختلف مسائل کا سامنا ہے، اس پر وزیر داخلہ نے کہا کہ وزیراعظم سے وفاقی ایپکس کمیٹی کا اجلاس پشاورمیں بلانے درخواست کروں گا تاکہ تمام مسائل پر وفاقی کمیٹی کے اجلاس میں بات ہوسکے۔
ذرائع کے مطابق وزیراعلیٰ خیبر پختونخوا نے محسن نقوی سے شکوہ کیا کہ بعض پنجاب اور وفاقی وزرا کرم کے مسئلے پر غیر سنجیدہ بیانات دے رہے ہیں، صوبائی حکومت پہلے دن سے مسئلہ حل کرنے میں سنجیدہ ہے۔
وزیر داخلہ نے یقین دہانی کرائی کہ وزرا کرم کے مسئلے پر آئندہ ایسے بیانات نہیں دیں گے، مسئلے کے پائیدار حل کے لیے صوبائی حکومت کو سپورٹ کرینگے اور دونوں حکومتیں مل کر کام کریں گی۔
ذرائع کا یہ بھی بتانا ہے کہ وزیراعلیٰ علی امین گنڈا پور نے وزیرداخلہ سے کہا کہ پولیس کے لیے بلٹ پروف گاڑیوں کا مسئلہ جلد حل کیا جائے، اس پر محسن نقوی نے یقین دہانی کرائی کہ بلٹ پروف گاڑیوں کا مسئلہ ترجیحی بنیادوں پر حل کیا جائے گا۔
