ویب ڈیسک: پشاور ہائی کورٹ کی جانب سے خیبرپختونخوا میں سینیٹ انتخابات نہ کرانے پر الیکشن کمیشن سے جواب طلب کر لیا گیا۔
چیف جسٹس پشاور ہائیکورٹ جسٹس اشتیاق ابراہیم اور جسٹس وقار احمد پر مشتمل دو رکنی بینچ نے پی ٹی آئی رہنما اعظم سواتی کی جانب سے خیبرپختونخوا میں سینیٹ انتخابات نہ کرانے کی درخواست پر سماعت کی۔ اس موق عپر وکیل درخواست گزار نے کہا کہ سینیٹ الیکشن کے حوالے سے 10 دسمبر کو اجلاس ہوا، ابھی تک اس پر مشاورت جاری ہے، مخصوص نشستوں کی نظرثانی پٹیشن سپریم کورٹ میں زیرالتوا ہے، اس کو بھی دیکھ رہے ہیں۔
چیف جسٹس اشتیاق ابراہیم نے ریمارکس دیتے ہوئے کہا کہ ہم آپ کو دو ہفتے کا وقت دیتے ہیں جس پر وکیل الیکشن کمیشن کی جانب سے دی جانے والی مہلت میں اضافہ کرنے کی استدعا کی گئی۔
عدالت نے کہا کہ آپ بتائیں کونسی تاریخ دیں، جس پر وکیل الیکشن کمیشن کا کہنا تھا کہ اس کیس کو زیرالتوا رکھیں ہم جواب جمع کرا دیں گے، اس پر چیف جسٹس پشاور ہائیکورٹ نے ریمارکس دیئے کہ آپ کو ایسی کھلی چھوٹ بھی نہیں دے سکتے۔ بعدازاں عدالت نے سماعت 16 جنوری تک ملتوی کرتے ہوئے الیکشن کمیشن سے جواب طلب کر لیا۔
