ویب ڈیسک: وفاقی تحقیقاتی ادارے نے کارروائی کرتے ہوئے ایجنٹس ہونے کے شبے میں وزارت خارجہ کے چار ملازمین گرفتار کر لئے۔
ایف آئی اے کے اینٹی کرپشن سرکل لاہور کی جانب سے کی جانے والی کارروائی کے دوران وزارت خارجہ کے رابطہ آفس لاہور کے گارڈ اور سویپر سمیت چار ایجنٹس کو گرفتار کرلیا گیا ہے۔ اس حوالے سے وفاقی تحقیقاتی ادارے کے ترجمان نے بتایا کہ وزارت خارجہ کے چار ملازمین گرفتار کر لئے گئے ہیں، ان میںرابطہ آفس سے ملزم کرامت، عباس، ظفر اورعدنان شامل ہیں، جبکہ تین ملزمان عبدالرحمٰن، طیب اور رستم موقع سے فرار ہونے میں کامیاب ہو گئے۔
ترجمان ایف آئی اے کا کہنا تھا کہ ملزمان دستاویزات کی تصدیق کیلئے شہریوں سے رقوم بٹورتے تھے، ملزمان سے مختلف دستاویزات، پاسپورٹس اور موبائل فون قبضے میں لے لیے گئے ہیں اور ان کے خلاف مختلف دفعات کے تحت مقدمہ درج کر لیا گیا ہے۔ڈائریکٹر ایف آئی اے لاہور زون سرفراز خان ورک نے اس حوالے سے بتایا کہ ایجنٹ مافیا کے خلاف بلا امتیاز کارروائیاں جاری ہیں، سادہ لوح شہریوں سے رقوم بٹورنے والے رعایت کے مستحق نہیں۔
