ویب ڈیسک: افغان وزیر خارجہ مولوی امیرخان متقی نے کہا ہے کہ افغان حکومت پاکستان سے مثبت تعلقات کیلئَے پرعزم ہے۔ افغانستان اور پاکستان کے درمیان تجارت اور ٹرانزٹ کے تبادلے کو مزید فروغ دیا جا سکتا ہے۔
افغان وزارت خارجہ کے مطابق پاکستان کے نمائندہ خصوصی برائے افغانستان محمد صادق خان نے کابل کا دورہ کیا جہاں انہوں نے افغان وزیرخارجہ مولوی امیرخان متقی سے ملاقات کی۔ اس دوران دونوں ممالک کے باہمی و سفارتی تعلقات پربات چیت کے علاوہ تجارت، راہداری اور عوامی امور پر بھی تبادلہ خیال کیا گیا۔
امیر خان متقی نے کہا کہ افغان حکومت پاکستان سے مثبت تعلقات کیلئے پرعزم ہے، دونون ممالک کے مابین تجارت اور ٹرانزٹ کے تبادلے کو مزید فروغ دیا جا سکتا ہے۔ اس کے علاوہ پڑوسی ممالک کے شہریوں کے درمیان آسان نقل و حرکت کے ساتھ موجودہ مسائل کے حل کی بھی کوشش کی جائے۔
پاکستان کے نمائندہ خصوصی برائے افغانستان محمد صادق خان نے افغان وزیر خارجہ کو پاکستان کے وزیر خارجہ کی جانب سے تہنیتی پیغام بھی پہنچایا، اس کے علاوہ انہوں نے افغانستان اور پاکستان کے درمیان مثبت تعلقات پر زور دیا۔
صادق خان کا کہنا تھا کہ افغانستان میں سکیورٹی پاکستان اور خطے کے بہتر مفاد میں ہے، دورے کا مقصد دو طرفہ سیاسی، اقتصادی، تجارتی اور ٹرانزٹ شعبوں میں تعلقات کو مضبوط کرنا ہے۔
