ویب ڈیسک: دنیا بھر کی طرح پاکستان میں کرسمس تقریبات کا انعقاد کیا جا رہا ہے، کرسمس کے رنگ، گھروں کے باہر کرسمس ٹری کی رنگینیاں، چرچز کی تزئین و آرائش دنیا بھر کی طرح پاکستان میں بھی کی گئی ہے۔ اس حوالے سے صدر اور وزیراعظم کی جانب سے مبارکباد کے پیغامات جاری کر دیئے گئے ہیں۔
دنیا بھر کی طرح پاکستان میں بھی مسیحی برادری آج کرسمس منا رہی ہے، کراچی کے سینٹ پیٹرک چرچ میں کرسمس کی دعائیہ تقریب کا اہتمام کیا گیا، جس میں مسیحی برادری نے بھرپور شرکت کی۔ حیدرآباد میں رات گئے سینٹ فرانس چرچ میں دعائیہ تقریب ہوئی اور مٹھائیاں تقسیم کی گئیں۔
ان تقریبات میں مسیحی خواتین، بچوں اور نوجوانوں نے شرکت کر کے ملک وقوم کی خوشحالی اور سلامتی کیلئے دعائیں کیں۔ فیصل آباد میں مسیحی خواتین نے کرسمس کیلئے خریداری کی۔
صوبہ بلوچستان کے دارالحکومت کوئٹہ میں بیکریوں اور کیک شاپس میں کرسمس کے حوالے سے ڈیزائن کردہ خصوصی کیکس نے خوب رنگ جمایا، لاہور میں بھی مسیحی برادری کرسمس منانے کیلئے پرجوش ہے، سرگودھا میں گرجا گھروں میں دعائیہ تقریبات منعقد کی جا رہی ہیں جبکہ سکھر کے گرجا گھروں میں اس خوشی میں کیک کاٹے گئے۔
کرسمس کے موقع پر ملک بھر کی طرح پشاور میں بھی چرچز اور گھروں کو سجایا گیا ہے، مسیحی برادری نے گھروں کو کرسمس ٹریز سے مزین کرلیا، اس حوالے سے انہوں نے خوبصورت لباس بھی خصوصی طور پر تیار کر رکھے ہیں۔ یاد رہے کہ دنیا بھر کی طرح پاکستان میں کرسمس تقریبات کا انعقاد کیا جا رہا ہے.
