ویب ڈیسک: خیبر پختونخوا کے مشیر اطلاعات بیرسٹر محمد علیف سیف نے کہا ہے کہ دہائیوں سے ملک پر مسلط سیاسی اشرافیہ نے قائد کے پاکستان کا چہرہ مسخ کیا ہے۔
یوم قائداعظم کے موقع پر اپنے پیغام میں مشیر اطلاعات خیبر پختونخوا کا کہنا تھا کہ ملک پر مسلط 2 سیاسی خاندانوں نے جمہوریت کی بنیادیں کھوکھلی کردی ہیں۔
انہوں نے پوری قوم کو قائداعظم محمد علی جناح کے یوم ولادت پر مبارکباد دیتے ہوئے کہا کہ بابائے قوم نے اپنی بصیرت، حکمت اور بے لوث قیادت کے ذریعے ایک آزاد ریاست کی بنیاد رکھی ان کی قیادت نے مسلمانوں کو ایک مقصد اور منزل عطا کی۔
انہوں نے کہا کہ دہائیوں سے ملک پر مسلط سیاسی اشرافیہ نے قائد کے پاکستان کا چہرہ مسخ کیا ہے ملک پر مسلط 2سیاسی خاندانوں نے جمہوریت کی بنیادیں کھوکھلی کی ہوئی ہیں۔
مشیر اطلاعات کا کہنا تھا کہ قائداعظم ہمیشہ دیانتدار، اصول پسند اور کردار کے پختہ انسان تھے انہوں نے اپنے الفاظ اور عمل سے یہ ثابت کیا کہ ایمانداری اور محنت کامیابی کی کنجی ہیں۔
بیرسٹر سیف نے مزید کہا کہ قائداعظم کے 3اصول اتحاد، ایمان، تنظیم کسی بھی قوم کی ترقی میں بنیادی حیثیت رکھتے ہیں آج کا دن ملک میں حقیقی جمہوریت کی بحالی اور قانون کی حکمرانی کی تجدید عہد کا دن ہے۔
صوبائی مشیر نے کہا کہ قائداعظم کا خواب ایک ایسی ریاست کا قیام تھا، جہاں ہر شخص کو مذہبی، سیاسی اور معاشرتی آزادی حاصل ہو ان کی قربانیوں کے سبب ہم آج آزاد فضا میں سانس لے رہے ہیں۔
بیرسٹر سیف نے کہا کہ قائد اعظم کی جدوجہد ہمیں یہ سبق دیتی ہے کہ مستقل مزاجی اور قربانیوں سے بڑی سے بڑی منزل حاصل کی جا سکتی ہے۔ یومِ قائد ہمیں یہ موقع دیتا ہے کہ ہم قائداعظم کی تعلیمات کو یاد کریں۔ قائد کی تعلیمات پر عمل پیرا ہوکر ایک مضبوط اور خوشحال پاکستان کی تعمیر ممکن ہے۔
