ویب ڈیسک: پاکستان پیپلزپارٹی کے سینئر رہنماء مولا بخش چانڈیو نے حکومتی اتحاد پر تحفظات کا اظہار کرتے ہوئے کہا کہ مجھے مسلم لیگ ن پر بالکل بھی اعتماد نہیں ہے ۔
حیدرآباد میں سیمینار سے خطاب میں سینئر رہنما پی پی پی مولا بخش چانڈیو نے کہا کہ پیپلزپارٹی نے ملک اور جمہوریت کی خاطر اتحاد کیا لیکن میرا ایمان اور اعتماد ان کے اتحاد پر نہیں ہے۔
انہوں نے کہا کہ آج کا دن ہمارے لیے 10 محرم سے کم نہیں، 27 دسمبر اور 4 اپریل نہیں بھول سکتے،بھٹو خاندان کے ساتھ عشق پر فخر ہے۔
رہنماء پیپلز پارٹی کا مزید کہنا تھا کہ محترمہ بے نظیر بھٹو کے پہلے اورآخری سفرمیں بھی ساتھ رہا، محترمہ کی یادیں ساری زندگی ساتھ رہیں گی، محترمہ قائد بننے کے بعد ہماری ماں بن گئی تھیں۔
مولا بخش چانڈیو نے کہا کہ جلسوں سے لیڈروں کی جان نکلتی ہے، لیڈر کہتے ہیں حالات ٹھیک نہیں جلسوں میں کیسے جائیں۔
حکمران اتحاد پر تحفظات کا اظہار کرتے ہوئے مولانا بخش چانڈیو کا کہنا تھا کہ مجھے مسلم لیگ (ن) پر اعتماد نہیں ہے، میرا ایمان اور اعتماد ان کے اتحاد پر نہیں ہے۔
پی پی پی کے سینئر رہنما نے کہا کہ گزشتہ سیلاب میں بھی وعدے پورے نہیں کیے حالانکہ پیپلزپارٹی نے ملک اور جمہوریت کی خاطر اتحاد کیا، گزشتہ حکومت میں بھی یہ موجود تھے۔
