ویب ڈیسک: رچرڈ گرنیل اور گولڈ سمتھ کا خواجہ آصف کے بیان پر شدید ردعمل، انہوں نے کہا کہ انہیں ہوش سے بیانات دینے چاہئیں۔
بانی پی ٹی آئی عمران خان کے سابق برادر نسبتی اور جمائما گولڈ سمتھ کے بھائی زیک گولڈ سمتھ نے وزیر دفاع خواجہ آصف کے بیان پر سخت ردعمل دیا ہے۔ زیک گولڈ سمتھ نے اپنی ٹوئٹ میں لکھا ہے کہ یہ ہے پاکستان کا اصل وزیر دفاع، یعنی ایک بڑا آدمی۔ اس نے آپریشن گولڈ سمتھ کے نام سے ایک چیز ایجاد کی ہے جو خوفناک اور یہودیت جیسی لگتی ہے۔
زیک نے اپنی ٹویٹ میں مزید لکھا ہے کہ اپنے سیاسی کیرئیر کے دوران خواجہ صاحب پر جن جرائم کے الزامات لگائے گئے، ان کی طویل فہرست دیکھ کر میں ان کے رویے سے حیران نہیں، میں نے صرف ایک بار آپ کے خوبصورت ملک کا دورہ کیا ہے۔ میں نے کبھی بھی پاکستان میں کسی بھی قسم کی سیاست کو براہ راست یا بلاواسطہ مالی امداد نہیں دی۔
انہوں نے مزید لکھا ہے کہ درحقیقت میں خوشی خوشی عمران خان کیلئے عطیہ کروں گا کیونکہ خواجہ آصف کے برعکس وہ ایماندار ہیں اور صرف پاکستان کے بارے میں سوچتے ہیں، انہوں نے کبھی بھی امداد کیلئے نہیں پوچھا اور نہ ہی کبھی پوچھیں گے۔ میں اسرائیلی نہیں، ہوشیار خواجہ آصف میرے نام سے الجھ گئے ہیں۔
ڈونلڈ ٹرمپ کے نامزد کردہ خصوصی ایلچی رچرڈ گرینیل نے خواجہ آصف کے بیان پر ردعمل دیتے ہوئے کہا ہے کہ واشنگٹن ڈی سی میں پاکستانی سفارتخانے اور سفیر رضوان شیخ کو کچھ وضاحتیں دینی ہوں گی۔ وزیر دفاع کی طرف سے جان سے مارنے کی دھمکیاں، اور آپریشن گولڈ سمتھ کے بارے میں پاگل پن کی باتیں لاپرواہی ہیں۔ اس بات کا جائزہ لیا جائے کہ امریکی ٹیکس دہندہ پاکستان کو کیا امداد فراہم کرتا ہے۔
امریکی تجزیہ کار مائیکل کولگمین نے خواجہ آصف کے بیان کو سام دشمنی قرار دیتے ہوئے کہا ہے کہ پاکستان کے وزیر دفاع عمران خان کو اسرائیلی اثاثہ قرار دیتے ہیں اور ان کی رہائی کے لیے عالمی مطالبات کو اسرائیل کی طرف سے سپانسر شدہ سازش کے طور پر پیش کرتے ہیں۔ یہ صریحاً مضحکہ خیز اور سام دشمنی، خان کے بہت سے ممتاز غیر ملکی وکیل اسرائیل کے بے لگام نقاد ہیں۔
یاد رہے کہ خواجہ آصف نے سماجی رابطے کی سائٹ ایکس پر اپنے پیغام میں کہا تھا کہ آپریشن گولڈ سمتھ کے ریکروٹ جہاں بھی موجود ہیں وہ عمران خان کو نجات دلانے کے لیے پاکستان کے مفادات کے خلاف بھر پور مہم چلا رہے ہیں، ان عناصر کو اسرائیل کی بھر پور حمایت حاصل ہے اور وہ میڈیا میں تواتر کے ساتھ گفتگو کر رہے ہیں۔
خواجہ آصف کا کہنا تھا کہ اس سے صاف ظاہر ہوتا ہے کہ عمران خان ایک اسرائیلی اثاثہ ہیں جس کے ذریعے وہ واحد مسلمان ایٹمی قوت کو خدا نخواستہ سر نگوں کرنا چاہتے ہیں، عمران خان کے لیے مغربی دنیا میں جو چند آوازیں اٹھ رہی ہیں ان پر یہ واضح ہونا چاہیئے کہ ہم پاکستانی قوم اپنے مفادات کا تحفظ کرنا جانتے ہیں، ہماری اول اور آخر ترجیح صرف اور صرف پاکستان ہے۔ یاد رہے کہ رچرڈ گرنیل اور گولڈ سمتھ کا خواجہ آصف کے بیان پر شدید ردعمل، انہوں نے کہا کہ انہیں ہوش سے بیانات دینے چاہئیں۔
